Табрики иди саъиди Қурбон - 2022

Табрики иди саъиди Қурбон - 2022 Ба номи Худованди бахшандаи меҳрубон Худоё, бар Муҳаммад ва Оли Муҳаммад дуруд фирист! Саломун алайкум Иди Қурбон аст, зикру шукри Раббонӣ кунед Дар Минои дил вуқуф аз ҳаҷҷи рӯҳонӣ кунед То наяфтодаст ҷон дар панҷаи гурги ҳавас Гӯсфанди нафсро гиреду қурбонӣ кунед Фаро расидани иди саъиди Қурбонро ба ҳамаи мусулмонони ҷаҳон ба хусус миллати мусулмону муқовим ва шарифу ранҷкашидаи Тоҷикистон ва ҳамаи тоҷикони ҷаҳон табрик ва таҳният мегӯем! Иди саъиди Қурбон ёдовари ихлосу талош ва таслими фармони Худо будани ҳазрати Иброҳим ва Исмоил (а) ва муқовимат дар баробари хостаҳои нафсонӣ ва васвасаҳои шайтонӣ ва комёбӣ дар имтиҳони бандагии Худои Субҳон аст. Ҳаҷҷи Иброҳимӣ ёдовари фидокорӣ ва вафодории хонадони ҳазрати Иброҳим дар роҳи Худо ва безорӣ аз душманони ҳаққу ҳидоят ва шайтонҳои ҷиннӣ ва инсонӣ аст! Бандагӣ кун, то ки султонат кунанд Тан раҳо кун, то ҳама ҷонат кунанд Сар бинеҳ дар каф, бирав дар кӯи дӯст То чу Исмоил қурбонат кунанд Бигзар аз фарзанду молу ҷони хеш То Халилуллоҳи давронат кунанд Худоё, ба ҳаққи дуои қабули ҳоҷиёни шоиста ҳамаи моро дар анҷоми бандагӣ ва комёбӣ дар имтиҳонҳо ва наздикӣ ба ризвони худат ва наҷот аз хостаҳои нафсонӣ ва васвасаҳои шайтонҳои ҷиннӣ ва инсонӣ муваффақ гардон ва золимонро ба сазои амалашон бирасон ва мазлумонро аз чангашон бираҳон ва моро ба субҳи саодату саломат бирасон! Ё Раб, ҳама касро ба мақсад бирасон! Бошад, ки дар он миёна мо ҳам бошем! Бо эҳтиром С. Маъниддин Иди саъиди Қурбони 2022