“БА Ӯ САВОЛ ЗИЁД АСТ...” БОЗДОШТИ БЛОГЕРИ БАДАХШОНӢ КОМЧЕК МИРЗОЕВ ДАР МАСКАВ

Блогер ва ризокори зодаи Бадахшон Комёр Мирзоев, ки дар шабакаҳои иҷтимоӣ бо тахаллуси Комчек Мирзоев маъруф буд, рӯзи 5 сентябри соли 2022 дар шаҳри Маскав дастгир шудааст. Манобеи огоҳи пойгоҳи хабарии “Бомдод” хабар доданд, ки шоми 5 сентябр ба хонае, ки Комчек Мирзоев ва чанд зодаи дигари Бадахшон иҷора менишастанд, кормандони пулиси шаҳри Маскав ва намояндагони мақомоти ҳифзи ҳуқуқи Тоҷикистон омада, Комчек Мирзоев ва ду тан аз ҳамхонаҳояшро ба шуъбаи пулис бурдаанд. Субҳи 6 сентябр пулиси Маскав баъди пурсуҷӯ он ду нафареро, ки муҳоҷири оддӣ буда, ягон фаъолияти сиёсӣ ва дар шабакаҳои иҷтимоӣ ҳам, ба қавле, ягон “нависонавис” надоштаанд, озод кардаанд. Вале Комчек Мирзоев дар боздошт боқӣ мондааст. Ба дӯстону наздиконаш, ки баъди шунидани хабари боздошти блогер ба назди шуъбаи пулис омадаанд, кормандони пулис гуфтаанд, ки “беҳуда мунтазир нашавед инҷо. Ба ӯ мақомоти Тоҷикистон саволҳои зиёд доранд ва ӯро бо худ ба Тоҷикистон мебаранд”. То ин соат дар бораи ба Тоҷикистон бурда шудани Комчек Мирзоев хабари мувассақе ҳанӯз ба даст нарасидааст. Вале дар чанд моҳи охир мақомоти Тоҷикистон тавонистанд аз Русия алакай ҳудуди 20 нафар аз фаъолони зодаи Бадахшонро дастгир карда, ба Душанбе баранд. Гуфтанист, ки аксари онҳо алакай рӯзе баъди дар Русия дастгир шудану “ғайб заданашон” дар Душанбе дар ҳабс “ёфт” мешуданд.