САЛОМ НАКАРДАНИ ЭМОМАЛӢ РАҲМОН БО СОДИР ҶАПАРОВ ЧӢ МАЪНӢ ДОШТ?

САЛОМ НАКАРДАНИ ЭМОМАЛӢ РАҲМОН БО СОДИР ҶАПАРОВ ЧӢ МАЪНӢ ДОШТ? Дар вохурии сарони се давлати дунё -Россия, Тоҷикистон ва Қирғизистон бо миёнчигарии Россия дар Остона президентони ду давлат- Тоҷикистон Эмомалӣ Раҳмон ва Қирғизистон Содир Ҷапаров (дар ин минтақае, ки Тоҷикистонро бегона мехонанд ҳама вожаҳо тоҷикианд, ин ном ҳам Ҷабборов аст, ки қирғизияш кардаанду Ҷапаров шудааст ) бо ҳам вохурии сард карданд, ҳатто шояд бори аввал дар ин минтақа бошад, ки сарони ду кишвар дар вохурӣ бо ҳам даст дода салом намекунанд. Акнун ба хотир биёр хонанда, ки гурӯҳе аз мухолифони давлати мо мегуфтанд муноқишаҳои марзи Тоҷикистону Қирғизистон кори дасти ҳукумати Эмомалӣ Раҳмон асту Содир Ҷапаров ва сарони нерӯҳои амниятии ду кишвар. Худи даст дода салом накардани Пешвои миллати мо Эмомалӣ Раҳмон бо Содир Ҷапаров аввал ин ки он ақидаро ботил кард, дуюм, ки ғурури тоҷикии моро исбот кард, чун Эмомалӣ Раҳмон замоне вориди толор шуд, ки Путин ва Ҷапаров аллакай дар онҷо буданд. Яъне тоҷик миллати сарпасту тарсу нест, эҳтиёт шавед. Хеле манзараи ҳаяҷоновар буд. Оини ҷавонмардӣ ва ғурури мардонагии Президенти моро бадхоҳон қаблан ҳам дар пусти худ санҷида дида буданд. Бо Ислом Каримов, президенти вақти Узбекистон дар Сочи айни ҳол рух дода буд, ки аз муносибати президенти худ роҳат карда будем. Ҳатто бо Доналд Трамп-президенти вақти Амрико президенти кишвари мо дархури миллати ориёии мо даст дода буд. Дар вохурии Остона ҳангоми вохурӣ рақиби мо бохт. Хеле хуб намебуд, агар Ҷапаров дертар меомад. Ин ҳам шояд ҳикмати Пешвои мо буд. Бо вуҷуди ин ҳам на сих сухту на кабоб. Натиҷаи вохуриро сомонаи Президенти Тоҷикистон чунин шарҳ дод: “ҷонибҳо ба мувофиқа расиданд, ки масъалаҳои ба миёномада танҳо бо роҳи сиёсию дипломатӣ, инчунин, тавассути фаъолгардонии кори гурӯҳҳои ҳукуматӣ ва коршиносон оид ба делиметатсия ва демаркатсия ... ҳал карда шаванд.” Агар мо дар назди рақибон маҷҳулу тарсу мебудем, чунин натиҷа ба даст меомад? Ҳаргиз! Он вақт фақат моро тарс медоданду таҳдид мекарданд. Ҳоло шукр, тадбири Пешвои мо ба фоидаи миллат шуд. Аҳмади Иброҳим, сармуҳаррири рӯзномаи "Пайк"