Gottfried Glechner - Gåstschdum

Då siz i lézdn Sundå in Guarchtna Kiridåg baim Baubék drin in da Gåstschdum ... hã s schã ghead, das a weng zua ged in da He om in da Håzadschdum "Dõan s laicht do widar amåi a wéng raufn?" deng i ma då hear i schã an étla åwa rumbin üwa d Schdiang und da Schdefi Dãni kimd in d Gåstschdum âna "Ged éps?" ... såg i "Jå" ... sågt a, "om raufn s das d Fezn floingt" "Jå mai" ... såg i, "då weant ned fui Fezn floing" Schdaum weads håid a weng. Meara bringan s jå haid do nimma zãm, de Muatabiawi ! Haid håidn s jå deart nix mear aus nix håidn s aus ... Wås soist da den denga, wo d Wød hî draibst, ... wãnst zwõanz jarige Kuntn foan Wiatshaus hearaust umanãnd lõa siagst, mid an Ais in da Hãnd? Då muas jå õa an Schedl aufwoaka ! Drum håidn s a nix mea aus ! Wãn a soichana a Håiwe-Kriagl am Kopf griagt, då håd ar oiwai glai an Schedlbasisbruch. Früa håd håid õanar a Loch ghåbt im Schedl, haid hãm s oiwai glai an Schedlbasisbruch. ... und i måg dés modean Glumbad e goa ned. Fria hân d Laid waid héchda gwén. Z Lãmbrechtn ... ... då hãma amåi grauft bain owan Wiat då hãma d Bian zãm glaubt, zégafoi ! Mia han jå gråd unsa drai gwén, géng a gãnz Duzad. Då hãma ausruka miasn, und baim éntan Wiat då hama nåchad wida zãm kema, mia drai. Mia siznt baim Disch, ... an iadn rinds Bluad üwa d Bapm åwa und wiar i schau, då schdégt in Schredl Sepm a Schdilet-Mesa in Hian drin. "He!" ... såg i, "du håst jå s Mesa nu schdeka drin!" "Aso?" ... sågt a. ... und zöigt s aua. Håd åwa so ungschikt ãzong, das a d Gling åbricht. Kuaz und guad, da Wiat z Hausl ... håd eam s nåchad mid da Baiszãng aua zong. "Hedn s e schdéka låsn soin" ... ... håd da Richda gmõand ba da Fahãndlung, "bis zan Dokda." åwa ... då schdékads eam haid nu drin wai da Sep, dea is üwahaupt ned zan Dokda gãnga. Jå mai, haid renan s in õan Drum zum Dokda. Fria is oiwai ois wida fu söm zãm gwågsn. Da Bõarichda, dés is a schdoaka Mã gwén ... dea håd da d Haxn grãnzt, bis wida âigschnåpt is und wås a Nakose is, ... dés håd saidna Zaid, üwahaupt neamt gwist ! Text: Gottfried Glechner Read by: Wolfgang Glechner Subtitles: Andreas Pflügl