Д.Ганбаатарын "Blue sky Mongolia" морь АНУ-д түрүүлжээ

"Макс"-ын Д.Ганбаатарын хээр үрээ эзэндээ 38000 ам.долларын ашиг хүртээлээ Одоогоос дөрвөн сарын тэртээ буюу өнгөрсөн оны 11 дүгээр сард "Макс" группийн захирал Д.Ганбаатарын хурдан хүлэг АНУ-ын морин тойруулгын уралдаанд түрүүлж байсан билээ. Түүний "Sky Blue Mongolia", "Mongolian star", "Queen of Mongolia" хэмээн нэрлэгддэг гурван ч үрээ АНУ-ын морин тойруулгын уралдаанд уралддаг. Д.Ганбаатар 2011 оны наймдугаар сард морин тойруулгад анх удаагаа "Sky Blue Mongolia" үрээгээ сойжээ. Тэр цагаас хойш нийт 16 удаа уралдсанаас хоёр удаа түрүүлж, хоёронтаа аман хүзүүдэж, нэг удаа гуравдугаарт хурдалсан байна. Тухайлбал, эл үрээ өнгөрөгч оны 11 дүгээр сарын 8-ны өдөр Хауторн хотод болсон морин тойруулгын уралдаанд түрүүлж, олныг баясгажээ. Эл хурдан буяныг Ноэл Вигил хэмээх азтай бүсгүй тогтмол унадаг аж. Харин сүүлийн хоёр хүлгийг өнгөрөгч оны аравдугаар сараас эхэлж уралдуулсан байна. Монголын толгой баячуудын нэг Д.Ганбаатарын хар хээр үрээ буюу "Sky Blue Mongolia" саяхан болсон морин тойруулгын уралдаанд дахин түрүүлж, эзэндээ 38 мянган ам.долларын ашиг хүртээжээ. Энэхүү хийморлиг хар хээр үрээ 2009 оны дөрөвдүгээр сарын 2-нд төрсөн агаад хувийн үзүүлэлтээр эзэндээ дунджаар 4223 ам.долларын ашиг авчирсан гэж гадны хэвлэлүүдэд мэдээлсэн байна. "Sky Blue Mongolia" үрээ сүүлийн 12 сарын хугацаанд хамгийн сайн уралдсан морьдын жагсаалтыг тэргүүлжээ. Мөн уралдаж эхэлснээсээ хойш эзэндээ нийтдээ 41691 ам.долларын ашиг авчирсан амжилтаараа 1991 оноос хойшхи шилдэг арван морины жагсаалтын тэргүүнд бичигдсээр байгаа аж. Э.ЭНХ-ЭРДЭНЭ