РЕКОРДИ ҒАЙРИОДДИИ ТОҶИКӢ БАРОИ ГИННЕС

ДУ ВИДЕОИ АҶИБУ ҒАРИБИ ТОҶИКӢ ДАР ОДНОКЛАССНИКИ Дар Одноклассники, видеоҳои аҷибу ғариб зиёд аст, аммо ду навори кӯтоҳе, ки фақат се чаҳор моҳ пеш дар ин шабака гузоштаанд, дар воқеъ ҳайратовар аст. Дар яке аз ин видеоҳо, ки бо номи «Аҳволи муҳоҷирон дар Русия» нашр шудааст, як ҷавони тоҷик дар дохили нақби тангу торе ба кору муҳоҷирӣ дар Русия нафрин мегӯяд ва бо муроҷиат ба хонаводааш дар Тоҷикистон фарёд мекашад, ки шумо ҳоли моро бубинед ва баъдан бигӯед, ки пул фиристед. Муҳоҷири ҷавон, ки дар чиҳил сонияи сӯҳбаташ 10 калимаи қабеҳро ба кор мебарад, мегӯяд: «Ин нақби семетрӣ аст, ҳамин ба сари ман фӯру равад, ягон нафари шумо ба доди ман мерасед, қавра мерасед. Пул мегӯед, пул мегӯед, пул мегӯед. Ягон бор ҳам намегуед, ки бепул хеста биё. « Дар идомаи сӯҳбаташ муҳоҷири ҷавон белеро нишон дод мегӯяд, ки нони ӯ ҳамин аст ва меафзояд, ҳарчӣ ки гуфт, шӯхист ва ҳар қадар, ки ба хонавода дар Тоҷикистон пул лозим шуд, мефиристад. Ба гуфтаи ӯ «тамоми ҷонканиии онҳо ба хотири хонавода аст.» Видеои 1 дақиқаву 40 сониягиро ки дар Ютюб ҳам ҳаст, тақрибан 14 ҳазор бор дидаанд. Баъзеҳо онро баёнгари кори машаққатбори муҳоҷирон дар Русия хондаанд, аммо гурӯҳи дигар муҳоҷири ҷавонро барои лафзи қабеҳаш сарзаниш карда ва гуфтаанд, ки ӯ бо ин кораш обрӯи муҳоҷиронро мебарад. Аммо қаҳрамони видеои дуввумӣ, ки ӯ ҳам дар ҳаққи муҳоҷирони корӣ дуои нек мекунад, ба навиштаи муаллифи видео бояд ба китоби рекордҳои Гиннес шомил карда шавад. Дар ин навор марде як пиёла равғани гармро аз дохили деги бузурги палав мехӯрад, ки тасаввури он бешак барои аксарияти шумо сахт аст. Исмати Розӣ муаллифи ин навор ба Радиои Озодӣ гуфт, ки қаҳрамони видео Ҳабиб Хоркашов, сокини 55-солаи рустои Арғанкули ноҳияи Тавилдара аст, ки дар гузашта аз ин корҳо низ кардааст: «Парвардигор бачаҳое, ки дар Русия ҳастанд, соқу саломат бошанду барори корашон бидиҳад.» Баъд нашри ин видео аз тарафи Исмати Розӣ, як корбари Одноклассники онро бештар аз 40 ҳазор маротиба дидаанд ва 500 шарҳ ҳам навиштаанд. Бисёриҳо аз ин кори Ҳабиб Хоркашов ҳайратзада шуда, ба ӯ аҳсану офарину боракалло гуфтаанд. Аз ҷумла корбаре бо номи Маъруф Хоҷаев навиштааст, «Мӯйсафед боқувват будааст.» Шаҳбоз Абдуллоев навиштааст, ки «Ба бобои терминатор гап нест.» Аксарияти шарҳҳои зери видео ҳамингуна аст, вале дар ин миён баъзеҳо навиштаанд, ки ин мард бо хӯрдани равғани зиёд ба ҷони худаш ҷабр мекунад. Аз ҷумла Рустам Рустамов навиштааст, «Барои дуо ҳазор раҳмат, вале нӯшидани рӯған ба ҷигар зарар дорад.» Шарҳи Аҳтамҷон Назаров ба ҳамин мазмун ва чунин аст: Охир баъд меноланд, ки дар Тоҷикистон бемории фишори хун аст. Ҳамита рӯгана бзанан конешна давлени мешаван.» Як бачаи зоҳиран шӯх бо исми Исои Қиёмзода ба Ҳабиб Хоркашов саломатӣ хоста вале гуфтааст, агар «иқадар хамири дигарам хӯрад дар дарунаш пирашки мегардад.»