Модар саҳнаи худкушӣ бо се фарзандашро нақл кард

Вазорати умури дохилии Тоҷикистон навори видеоии ҷавонзани тоҷикро нашр кард, ки ҳангоми қасди худкушӣ се фарзандашро ҳалок кард, вале худаш зинда монд. Дафтари матбуоти вазорат рӯзи 7-уми июл бо нашри видеои бозпурсии Парвина Абдуллоева, сокини 35-солаи ноҳияи Ёвон аз тариқи телевизиони давлатӣ гуфт, ки ӯ ба сабаби ҷанҷол бо шавҳараш ва аз рашк хостааст, худу фарзандонашро бикушад. Ба гуфтаи муфаттишон, Парвина Абдуллоева, баъди тамошо додани Оминаи 5-сола, Маҳинаи 6-сола ва Зиёвуддини 7-сола дар Душанбе онҳоро ба назди наҳри Ҳисор оварда ва худро ҳамроҳи кудаконаш ба об андохтааст. Аммо гурӯҳе аз ҷавонон модарро аз об берун кардаанд, вале кудаконашро наҷот дода натавонистаанд. Алайҳи Парвина Абдуллоева бо иттиҳоми қатли кӯдакони ноболиғ парвандаи ҷиноӣ боз кардаанд.