Савол (ёхуд кимман?) - Savol (yohud kimman?) HD

Автор: Муаттар Озод Савол (ёхуд кимман?) Тилим куйди сизга бериб бир савол, Сўзларингиз ожиз қолди ўшал дам. Сездим сўроғимнинг келганин малол, Жимгина... чуқур "ух" тортдингиз бирам. Орага жон олар сукунат чўкди, Ортиқ кутмоқликка етмади сабрим. Қароғим тинимсиз маржонин тўкди, Чекди-я оқловсиз ишончнинг жабрин. Гуё тўхтаб қолди бутун коинот, Йўқликка ғарқ бўла бошлади тилак. Яна илинжимни айлади барбод, Умидсиз қандайин яшамоқ керак? Оҳиста тиғ санча бошлади сукут, Гумонлар кемира бошлади ичим. Кулбаи маконим бўлибон унут, Дунёни ўлчабди янглиш қаричим. Тонгга қадар мавҳум икки ўт аро, Оҳ чекди бу юрак кўксимга уриб. Энди дил изҳорин айтмангиз асло, Сиз учун кимлигим билмасдан туриб. Саволимга жавоб бермасдан туриб... Муаттар Озод