Ешым, родо тукымым аралыме йӱла

Молитва на марийском языке. Оберег для семьи, рода, народа от коварной болезни и всякого зла. Читается на растущую луну, утром, во время восхода солнца. Читает молитву марийский жрец, онаеҥ Виталий Головин. Сурт кӧргым, тукым вожым осал вий дечын, осал кугу чер дечын аралыме йӱла. Юмылан тӱшкан кумалме мут. Ӱстембаке ош солыкым шарен, тичмаш киндым, мелнам, пурам, пучымышым, шынден, шиште сортам чӱктен. Ешыште кугырак (пӧръеҥ / ӱдырамаш) пелешта. А поро ден тол, йӧратен лийын шого Ош Поро Кугу Юмо! Таче теве эр кече ден кынелын, кидым-шӱргым яндар вӱдет дене шӱялтен, ош тувырым чиен, ош солыкым ӱстембаке шаралтен, тичмаш киндым, ӱян мелнам, тамле немыретым, шоҥешталтше пурам ош солыкеш шынден, эр кече велке шогалын, саска сортам чӱктен, вуйым савен тауштена. Ош Поро Кугу Юмо, тау тыланет – таче кече мартен ешем, шочшем, уныкам, марий калыкемат йӧратен ашненат. Йӱаш – кочкашат пуэн шогенат, чиен шогалашат пуэн шогенат, илаш верымат пуэнат, еш дене илашлан шке пыжашымат пуэнат. Пашаче калыкнам шийвундо перке дечат ойырен отыл, кинде, мӱкш, вольык, чодыра, олык, вӱд перке денет ашненат. Йочалан кушкаш, ушым поген тунемаш пуэнат, кушкын шушылан – ешым поген илаш пуэнат, вий валне улшылан пашам пуэн, ешым кучаш пуэнат, илалше-влаклан - еш пелен илаш шочшо-уныка верч куанен илаш пуэнат. А Поро Ош Кугу Юмо, таче теве калыкна коклашке осал чер толын, осал чер пелен осал койыш толын. Шинчалан койдымо осал калыкнам пытара, айдемын вийжым налеш, ӱмыржымат кӱрлеш. Теве ынде вуйым савен кумалаш шогалынна, аралтышым йодына, Ош Поро Кугу Юмо, кумылет поро лийже, Эр Ӱжара Юмо, Кава Юмо, Тӱня Кугу Юмо шке поро Юмо ешет дене, Кугу Серлагыш Юмо, Мер Юмо, Мер Юмын Пиямбарже, Кече Ава, Поро Шочын Ава, Пӱрышӧ Юмо, Сурт Юмо, Сурт Суксо, Сурт Серлагыш, Арняште шым кече, Шым Юмо, шым Суксо, шым Серлагыш, Вуйӱмбал Юмо, Вуйӱмбал Суксо, Вуйӱмбал Серлагыш, Тендан ончылан тӱрлӧ верыште илыше марий-влак ик жапыште шогалын, иксемын шонен, вуйым савен кумалын шога. Шке еш дене илыме сурт-оралтемлан, суртеш илыше ешемлан, шочшо уныкамлан, ашныме вольыкемлан, ыштен кучымо пакчалан, йӧратен ашныме мӱкшемлан, изам-шольо, ака-шӱжар-влак, нунын ешыштлан, шым тукым ончыклан, шочмо мландемлан, калыкемлан кугу аралтышым кумалын йодына. Осал еҥ дечын, еҥ осал дечын, кугу мардеж дечын, кугу тул дечын, кугу вӱд дечын, мланде чытырналтмаш дечын, кумдан шарлыше осал чер дечын, тура лавыра мут дечын, Юмын шулдыр дене авырен, арален шогыза, сай серлагыш дене серлаген шогыза. Еш дечат, сурт дечат, шочшо-уныка дечат ида кӱрл, сай тазалык дечын ида кӱрл, кинде, шийвундо дечат ида ойыро. Поро Пӱрышӧ Юмо, поро пӱрымаш дене ашнен шого ешем, калыкем. Поро Перке Ава шке шулдыр йымаланет тичмаш перке дене ашнен шого. Еш перке, тазалык перке, сурт перке, кинде-шийвундо перке дене, мӱкш-вольык перке дене, олык-нур перке дене, чодыра-вӱд перке дене, паша перке денат йӧратен ашныза. Эр ӱжара гае волгалтын, чевер кече гае нӧлталтын, шӱдыр гае чӱчкен, илыш верчын куанен илаш поро шулыкым пуэн шого