«НВК Кубога»: Финал (08.04.22) HD

«Саха» национальнай көрдөрөр-иһитиннэрэр хампаанньа өрөспүүбүлүкэ нэһилиэктэрин ортотугар спорт национальнай көрүҥнэригэр ыыппыт «НВК Кубога» күрэҕэ түмүктэннэ. Саха сирин 15 нэһилиэгин хамаандата биир ый устата күрэхтэстэ. Кыайыылааҕынан иккис сылын Кэбээйи улууһун 2-с Лүүчүн нэһилиэгин Мастаах сэлиэнньэтин хамаандата буолла уонна 300 000 солкуобай суумалаах сертификатынан наҕараадаланна. Тыҥааһыннаах киирсии кэнниттэн Бүлүү Чинэкэтэ 4-с миэстэни ылла, Уус-Алдан Тандата - үһүс миэстэни ылла, Таатта улууһун Чымынаайыта - иккис миэстэ. Биирдиилээн көрүҥҥэ рекордсменнар: «Тутум маһы аннынан тахсыыга» Святослав Семенов (Бүлүү) 50 эргиири оҥорон рекорд олохтоото. «Кырынаастааһыҥҥа» Ян Семенов (Үөһээ Бүлүү) 16,19 сөкүүндэни көрдөрдө. «Бэһирик сүүрдүүгэ» саамай кыра бириэмэни көрдөрдө - Эдуард Куприянов (Таатта). «Хабылыкка» 15-тэ хаппыт уонна «Ойбонтон уулааһыҥҥа» 14,62 сөкүүндэни көрдөрбүт Петр Перямков (Уус Алдан) икки төгүллээх рекордсмен буолла.