Æри ма æхца!

Кæд де `вæрæнтæ æхцайæ байдзаг сты, лыстæг æфсæйнаг æхца чыссæйы нал цæуы, йæ дзыгъал-мыгъулæй та дæ хъуырмæ сдæ, уæд сæ банкмæ бахæсс. Удæнцой æмæ нервыты сабырдзинадæн финансон уагдоны æрхъуыды кодтой адæмон акци. Æфсæйнаг лыстæг æхца ивынц гæххæтынтыл. Цæгат Ирыстоны дæр ацы акци арæх саразынц. Фæлæ адæмæн цас пайдайаг у, уый уыцы-иу сныхасæй нæ зæгъдзынæ. Банчытæ æххæст кæнынц иу сæйраг хæс. Дзыппытæ æхцайæ дзаг куы уой,уæд ма уымæй хуыздæр цы ис? Уæлдайдæр та ма сæ дзæгъ-дзæг нæ, фæлæ сæ сыбар-сыбур куы цæуа, уæд. Лыстæг æхцатæ чыссæйы нæ бацæудзысты, дзыппы та уæлдай дзыгъал-мыгъул фæкæнынц. Уæвгæ бирæтæ сæ æхцайыл дæр нæ нымайынц. Бæрæггæнтæм гæсгæ, лыстæг æфсæйнаг æхцатæй нæ бæстæйы алы цæрæгмæ дæр фæйнæ 400 сомы хауы. Адæмы удæнцойæн банчытæ арæх саразынц цæрджытæй згъæр æхцатæ исыны акци. «Æз абон æрбахастон 1 мин сомы лыстæг æхцатæй. Фæнды мæ сæ баивын, бирæ мæм дзы æрæмбырд ис. Æнæзивæгæй мæм фæкастысты кусджытæ, æхца мын баивтой 200 сомы ног купюрæтæй», – банчы лæггæдтæй пайдагæнæг Гæбæраты Наталья. Национ банчы куыд зæгъынц, афтæмæй æфсæйнаг æхцатæ ивынц сæ фæлхасадон хъомыс гыццыл кæмæн у, ахæмтыл. Уый экономикæйæн пайда у. Зæгъæм, гæххæттын 50 сомы цалдæр мæймæ базæронд вæййы æмæ пайда ткæнынмæ нал фæбæззы. Фæлæ æфсæйнаг æхцатæ та дæсгай азты иу къухтæй иннæтæм рахау-бахау фæкæнынц. Зилдухы куы сбирæ вæййынц, уæд сæ банчы æркъаддæртæ кæнынц. «Нæ акцийы фæлгæты, нæ республикæйы цæрджытæ цы лысæг æхца æрбахæссынц, уыдон баивæм. Афтæмæй сæм гæнæн ис, æмæ бахауа юбилеон æфсæйнаг æхца дæр. Уый тыххæй уæлæмхасæн фидын ницы хъæуы», – РЦИ-Аланийы национ банчы сæрдары хæдивæг Хъуылцыты Юрий. Акцийы сæйраг нысантæй иу у, цæмæй 1 æмæ 50 капечы бынтондæр фесæфой. Ныртæккæ сæ нал уадзынц. Банчы 1 капекк рауадзынæн хардзгонд æрцæуы 40 капеччы, 50 капеччы рауадзынæн та – 65. Фæлæ банчы кыд зæгъынц, афтæмæй ахæм æфсæйнаг æхца дæр хъæуынц. Уæйгæнæг аргъыл 90 капечы куы æрфыссы, уæд йæ хæс у æлхæнæгæн фæстæмæ йæ 10 капеччы раттын. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv