Дар Душанбе барои ношунавоён кӯдакистон боз мекунанд HD

Шаҳрдорӣ Душанбе тасмим дорад, барои кӯдакони маҳрум аз имконоти гуфтору шунавоӣ боғчаи бачагона бунёд кунад. Ин боғчаи бачагона дар назди мактаби махсуси таҳсилоти ҳамагонии рақами 8, воқеъ дар ноҳияи Фирдавсии пойтахт, ки атфоли лолу ношунаво аз саросари кишвар дар он ҷо таълим мегиранд таъсис дода хоҳад шуд. Ҳусния Абуразоқова раҳбари ин муассисаи таълимӣ чаҳоршанбеи 24 сентябр ба Радиои Озодӣ гуфт, дар ин бора шаҳрдорӣ Душанбе, дастуреро имзо кардааст. Таъсиси чунин як кудакистон барои атфоли маҳрум аз имконоти гуфтору шунавоӣ дар ҳолест, ки бо ба даст овардани истиқлолият, Тоҷикистон чунин боғчаҳои махсусро надорад ва кудакони кару гунг ҳангоми ҳафтсолагӣ маҷбуранд, бидуни омодагӣ ба мактаб раванд. Мактаби махсуси таҳсилоти ҳамагонии рақами 8, ягона мактаби таҳсилоти ҳамагониест, ки атфоли лолу ношунаво аз саросари кишвар дар он ҷо таълим мегиранд. Феълан дар ин муассисаи таълимии 12-сола ба 180 хонандаи маҳрум аз имконоти гуфтору шунавоӣ, ки 53 нафарашон духтарон ҳастанд 28 омузгор дарс гуфта мегӯянд. Ҳусния Абуразоқова раҳбари ин муассиса, мегӯяд, бинои мактаб, ки аз замони Шӯравӣ боқӣ мондааст имкони фарогирии теъдоди бештари хонандагонро дорад.