ВИДЕО НАГИР, КИ ОТДЕЛ МЕБАРАМУТ... КАШОКАШИ КОРМАНДИ БДА БО ЯК МУСОФИР ДАР ФАЙЗОБОД
Фарҳод Худоёров, сокини деҳаи Яшми ноҳияи Рашт ва роҳбари бахши маҳаллии ҳизби сотсиал-демократи Тоҷикистон бо ирсоли як видео ба сомонаи “Ахбор” хабар дод, ки рӯзи 13 ноябр ҳангоми сафар аз ноҳияи Рашт ба Душанбе дар ҳудуди ноҳияи Файзобод ба сабаби онки мехост қонуншикании кормандони БДА (Бозрасии давлатии автомобилӣ)-ро бо телефонаш ба навор бигирад, ӯро боздошт карда, ба шуъбаи корҳои дохилии ноҳияи Файзобод бурдаанд. Фарҳод Худоёров мегӯяд, мошини таксиеро, ки ӯ савори он ба пойтахт мерафт, кормандони БДА дар сари гардиш манъ карданд. Ӯ мегӯяд, гузоштани посгоҳ дар сари гардиш хатари садамаро ба вуҷуд меорад ва аз ин рӯ, ӯ хост, ки чунин қоидавайронкунӣ аз ҷониби худи кормандони БДА-ро ба навор бигирад. Давоми қиссаро аз худи Фарҳод Худоёров мешунавем: “Ман дар ин тарафи роҳ истода будам ва дар сари гардиш мошинҳоро манъ кардани кормандони БДА-ро ба навор гирифтам. Як корманди БДА наворгирии маро дида, аз роҳ гузашт ва пеши мо омада, бо таҳдиду зӯрӣ талаб кард, ки наворро кӯр кунам, вагарна маро ба ШВКД мебарад. Аввал як муштам зад ва сипас бо мақсади аз дастам кашида гирифтани телефон хеле кашокаш кард ва аз тасмаи миёнам бо ҳарду дасташ чунон сахт кашид, ки тасмаам канд ва миёнам ҷароҳат бардошт. Ин корманди БДА, ки номаш Вазир будааст, вақте таҳдиду зӯриаш кор надод, ба зорӣ гузашт ва пешниҳод кард, ки агар наворро пок кунам, 50 сомонӣ ба ман медиҳад. Ман розӣ нашудам ва гуфтам, ин видеоро расонаӣ мекунам, то ӯ барои кирдораш ҷазо бигирад. Кормандони БДА сипас маъмурони фаврӣ-ҷустуҷӯӣ аз ШВКД ноҳияи Файзободро ба ёрӣ даъват карданд. Онҳо омада, маро ба ШВКД шаҳраки Файзобод бурданд. Ман, ки чунин пешомадеро интизор доштам, телефонамро дар дохили мошин пинҳон кардам...