Кубок президента Таджикистана по ДЗЮДО. 05.10.2016 Кисми -1

Диррӯз соати 15-00 дар шаҳри Ваҳдат мусобиқаи байналмилалӣ оид ба дзюдо барои дарёфти «Ҷоми Президенти Ҷумҳурии Тоҷикистон» баргузор шуд. Федератсияи дзюдои Тоҷикистон иттилоъ доданд, ки мусобиқоти байналмилалӣ дар риштаи гӯштини дзюдо барои дарёфти «Ҷоми Президенти Ҷумҳурии Тоҷикистон» шурӯъ аз соли 2013 гузаронида шуда, се мусобиқаи пешин дар пойтахти кишвар баргузор шуда буданд. Имсол дар мусобиқаи байналмилалӣ оид ба дзюдо барои дарёфти «Ҷоми Президенти Ҷумҳурии Тоҷикистон» варзишгарони Тоҷикистон, Ҷопон, Амрико, Куба, Непал, Покистон, Афғонистон, Эрон, Беларус, Русия, Италия, Мисри Араб, Украина, Ӯзбекистон, Қазоқистон, Қирғизистон ва Озарбойҷон ширкат меварзинд. Баъд аз рақобатҳои шадиду оштинопазир ба шоҳсуфраи ифтихории “Ҷоми Президенти Ҷумҳурии Тоҷикистон” намояндагони кишварҳои Ӯзбекистон, Куба ва Укроин бар шуданд. Мақоми сеюмро паҳлавонони ӯзбек Муҳсин Хисомиддинов ва Абдулло Тангриев аз худ карданд. Нишони нуқраи ин сабқати бонуфуз насиби Гарсия Мендоза варзишгари кубагӣ ва мақоми аввал ва ҳам “Ҷоми Президенти Ҷумҳурии Тоҷикистон-2016” насиби Станислав Бандароенко шуд. Станислав кишвари Укроинаро дар рақобатҳо намояндагӣ мекард. Ёдовар мешавем, ки маблағи ҷоизаи мусобиқаи мазкур 15 ҳазор доллари ИМА-ро ташкил дода, ғолиби ҷои аввали мусобиқа бо 7 ҳазор доллар, зинаи дуюм — бо 4 ҳазор ва зинаи сеюм — бо 2 ҳазор доллари ИМА қадрдонӣ мешаванд.