Таблиғи либоси миллӣ аз минбари масоҷид HD

Мулло Ҳайдар Шарифзода, сархатиби масҷиди марказии шаҳри Кӯлоб ба номи Имоми Аъзам Абуҳанифа, рӯзи душанбеи 28 июл, ба ҳангоми мавъиза дар назди намозгузорон либоси модарону бибиҳои тоҷикро беҳтарин сатр хонд ва гуфт, "ҳар гоҳе, ки телевизиони Тоҷикистон акси модари марҳуми Эмомалӣ Раҳмон, раиси ҷумҳури Тоҷикистонро нишон медиҳад, либоси ба бар кардаи ӯй беҳтарин сатр аст." Ба ин далел рӯҳонии шинохта аз ҳамаи модарону хоҳарони тоҷик хост, то чунин либос пӯшанд ва аз ба бар кардани либосҳои танге, ки бадани занро барҷаста нишон медиҳад, худдорӣ кунанд. Сархатиби масҷиди марказии шаҳри Кӯлоб гуфт, ки занону духтарони тоҷикро мебояд аз пӯшидани либоси бегона парҳез намоянд ва беҳтар аст, ки пӯшидани либоси миллии модарону бибиҳои худ тақлид кунанд.