"Илгээлтийн эзэд" Хэвлэлийн бага хурал / 2016.03.03 / HD

“Илгээлтийн эзэд” аяныг дуучин МУГЖ С. Жавхлан, МУГЖ Т. Баясгалан нар санаачиллаа Монгол улсын хэмжээнд эдийн засгийн хямрал болон цаг уурын хүндхэн нөхцөл байдал үүсээд байгаа хэдий ч Монгол хүний холч ухаан, сайхан сэтгэлийн илэрхийлэл болсон “Илгээлтийн эзэд” аяныг санаачлан эхлүүллээ. Малчин түмэн Монголчууддаа туслах зорилготой “Илгээлтийн эзэд” аяныг дуучин МУГЖ С. Жавхлан, МУГЖ Т. Баясгалан, “Хамаг Монгол” төсөл нар хамтран санаачилж, МУ-ын нийт ард иргэд, төрийн болон төрийн бус байгууллагууд, залуучуудыг хамтран ажиллах уриалгыг дэвшүүлж байна. Өнөөдрийн байдлаар улсын хэмжээнд нийт нутаг дэвсгэрийн 70 гаруй хувь нь цасан бүрхүүлтэй, өвөлжилт хүндрэлтэй болон хаваржилтын байдал ч цаашид хүндэрч болзошгүй урьдчилсан мэдээ байна. Иймд ” Илгээлтийн эзэд” аяны хүрээнд “Нэг хүүхэд-нэг нэмнээ” , “Малчин оюутан” зэрэг хөтөлбөрийг БСШУЯам хариуцан 3 сарын 3-наас эхлэн 21 хоногийн хугацаанд хэрэгжүүлэхээр болоод байна. Мөн ХХААЯам болон ОБЕГ-ын хамт олон “Илгээлтийн эзэд” болох МУГЖ С. Жавхлан, МУГЖ Т. Баясгалан нарын хамтарсан тоглолтоор сэтгэлийн дэм, тусламжыг Монгол орноо бүтэн тойрон хүргэх юм. Улаанбаатар хотоос эхлэх “Илгээлтийн эзэд” аялан тоглолт ард түмний сэтгэлд хоногшсон аялгуут сайхан дуугаар хөглөгдөж, хүнд хэцүү цаг үеийг даван туулах сэтгэлийн дэм өгөх зорилготой бөгөөд уг аяныг олон нийтэд таниулан сурталчилах ажлын хүрээнд “Илгээлтийн эзэд” цуврал нэвтрүүлгийг бэлтгэн хүргэх болно. Энэхүү сайн үйлсийн аянтай та бүхэн нэгдэн, уриалгыг олон нийтэд таниулан сурталчилж, Эх орны ирээдүй болсон хүүхэд залуучуудын бүтээлч ажлыг дэмжин, аяны турш хамтран ажиллахыг урьж байна.