08 04 2017 Сыырдаахха куйуур HD

Уус Алдан улууһун Бэрт Ууһун нэһилиэгэр былыр-былыргыттан, инньэ Майаҕатта Бэрт Хара саҕаттан балыктааһын биир сүрүн дьарыктара буолан, күн баччатыгар тиийэн кэллэҕэ. Ол курдук, кинилэр сыллата, күһүн, саас, сайын буоллун муҥхаҕа, илимҥэ, куйуурга бэрт улахан болҕомтону уураллар. Биллиилээх туонаһыт, балыксыт бэрдэ Петр Гаврильевич Портнягин - Генерал нэһилиэгэр, улууска эрэ буолбакка, кэлин Кэбээйи сиригэр тиийэ баран балыктаабыта, туона үктээбитэ биллэр. Кини бу орто дойдуга суох буолбутун кэннэ кэргэнэ Матрена Николаевна, оҕолоро, сиэннэрэ Петр Гаврильевич сырдык аатын үйэтитэн сыл аайы дойдуларыгар Сыырдаахха тахсан олохтоох дьаһалта, кулууп уонна аймахтара, доҕотторо, табаарыстара көмөлөрүнэн куйуур күрэҕин ыытар буолбуттара уонтан тахса сыл буолла. Бу күрэс эрдэттэн ыытыллар сирин талыыттан саҕалаан, туох баар ымпыгын-чымпыгын ырытан, сыаналаах бириистэригэр тиийэ ылан, куйуур күрэҕэр кэлэр кыттааччылары, көрөөччүлэри барыларын итии аһылыгынан хааччыйан, сааскы ылааҥы күн салгыҥҥа дуоһуйа сынньанар, бэйэтэ туһунан бырааһынньыкка кубулуйар. Итии аһылыкка анаан хоту сир маанылаах кыыл табатын этиттэн саҕалаан, сорох дьыл кус-хаас этигэр тиийэ аҕалан дьоннорун маанылыыллар, күндүлүүллэр. Бу ыытыллар тэрээһиҥҥэ улуус нэһилиэктэрин сэргэ ыаллыы сытар Мэҥэ Хаҥалас улууһун нэһилиэктэриттэн тиийэ кэлэн кытталлара куйуур күрэҕэ сахаҕа биир бастыҥ дьарык буоларын өссө төгүл санатар. Оннук буола да турдун. Тэрийээччилэр сүрүн биир сыаллара ол. Куйуур күрэҕэр балык кэлиитэ эриэ дэхси буолбат, Сорох дьыл өлгөмнүк, сорох дьыл кыратык бэрсэр. Ол балык баар сирин таба тайаныыттан эмиэ улахан тутулуктаах. Дьэ, онон 2017 сыл муус устар ыйыгар Сыырдаахтан чугас сытар Налыгы алааһыгар ыытыллыбыт куйуур күрэҕин эһиги болҕомтоҕутугар таһаарабыт. #Куйуур #маҥкы #түөрэй #киспэ #туу #УусАлдан #Сыырдаах #Налыгы #муусанньыыта