Дар ноҳияи Синои Душанбе боғи ба номи қаҳрамон ба партовгоҳ табдил ёфтааст.

Яке аз боғҳои дар гузашта серодами ноҳияи Синои Душанбе, исми қаҳрамони интернатсионалист Александр Мироненкоро дорад, дар ин рузҳо шабеҳи харобаҳои атрофи ниругоҳи атомии тахрибшудаи Чернобилро дорад. Шояд дар ин боғ замоне гулҳо мешукуфтанд, аммо имруз ҷои он гулҳоро хору хаси хушкшуда ва қисмате ҳам оташзада «ҷилва» мекунад. Теъдоде аз дарахтони сарсабзи чанд солаки пеш бо заҳмат шинонда ва шояд аз тариқи телевизион барои ин сарсабзкунонӣ «ҳисобот» дода низ хушк ва сарозер шудаанд. Атрофи курсиҳои истироҳат партобгоҳеро мемонад, ки ҳатто аз назди он убур кардан дилро беҳузур месозад. Ин боғ, ки дар шафати шуъбаи 1-и умури дохилаи ноҳияи Сино мавқеъ дорад, нигаронии кормандон ва маъсулони ин мақомро ба бор оврдааст. Ба гуфтаи масъулони ин идораи милиса боғи Мироненко, ки аслан чароғ дорад, пас аз шом мисли як ҷангали ваҳмангез аст ва метавонад, ба як макони судури ҷиноятҳо табдил шавад. Мақомоти умури дохилаи Сино 1 мегуянд барои ҳалли мушкилоти ин боғ бо номаи расмӣ мақомоти ба ҳукумати ноҳияи Сино муроҷиат кардаанд, аммо то ҳол посухе нагирифтаанд ва иқдомеро ҳам ҷиҳати ҳалли мушкили боғи қаҳрамони интернатсионалист намебинанд.