Fakt va Fikr (5-Qisqa): Şov-şuvli maqtovlarning OLDI-10 taligi HD

Охирги 5 йилда Ўзбекистонда турли поғонадаги амалдорларга тўғридан-тўғри ёки ватанпарварварлик ниқоби остида момиқ қўйишлар жамоатчилик томонидан қизғин муҳокама қилинмоқда. Қўштирноқ ичидаги “пахтакор”ларнинг мақтовларини эшитиб, “Бу заҳматкашларнинг қўллари эмас, тиллари қавариб кетган бўлса керак” – деган ҳаёлга бориш мумкин. “Факт ва Фикр”нинг бугунги сонида энг шов-шувли мақтовларнинг ОЛДИ 10 талигини эътиборингизга тақдим қиламан. 10-чи ўриндан 1-чи ўринга қараб кетдик! Ўтган йил декабрь ойи сўнггида “Би-Би-Си” Ўзбек хизматининг журналисти Ибрат Сафо “Фейсбук”даги ўз саҳифасида истеҳзоли бир пост қўйди. Испания сафари ҳақида ҳикоя қилар экан: “Тоғнинг тепасига чиқиб олиб, 81 марта “муҳтарам” деб қичқирдим. “Муҳтарам-тарам-тарам” бўлиб акс-садо қайтиб келадими, десам, ўрнига фақат испанларнинг сўкинишлари эшитилди. “Бизда бу сўз диктатор Франко пайтидан бери ишлатилмаган, пута мадре”- деди хўв чапдан 11-уйдаги бир бобой” – дея ёзди журналист. Бу пости билан Ибрат Сафо амалдор шахсларни улуғловчи маддоҳлар фақат нодемократик режимларида урчишига шаъма қилди. Ким кимдан умид қилса ёки қўрқса, шуни мақтайди. Аллоҳдан умидан қилган ва қўрққан Аллоҳни, бандасидан умид қилган ва қўрққан бандасини мадҳ қилади. Амалдорларни улуғлаш дину диёнатдан йироқ, интеллектуал қолоқ, маънавий паст, қўрқоқ ва худбин кимсаларга тўла жамиятларга хос иллатдир. Ишонмасангиз, фактларни ўрганинг ва фикр қилинг! “Факт ва фикр” каналига обуна бўлишни унутманг! Бобомурод АБДУЛЛА 2021 йил 11 февраль