СУҲБАТИ МАРДИ МУҲОҶИР БО ПИСАРАШ: БЕЗОРИ ҶОН ШУДАМ

Каримҷон Ёров, як ҳомии ҳуқуқи муҳоҷирони тоҷик дар Русия видеои суҳбати телефонии як муҳоҷири зоҳиран ғармӣ бо писарашро нашр кард. Писари ин марди солманд, ки барои таъмини рӯзгори хонаводааш ба Русия омадааст, аз падараш барои кадом коре пул мепурсад. Вале мард дар ин видео бо як садои гиряолуд ба фарзандаш аз азоби сахташ дар Русия шиква мекунад. Садои писар шунида намешавад, вале он чӣ ки ин мард мегӯяд, он қадар таъсирбахш, ё ба қавли дигар, мунҳасир ба фард аст, ки инҷо пурра меорем (дар асли видео ин мард аз ғояти қаҳр чандин бор дашномҳои қабеҳе ҳам ба забон меорад, ки ба хотири риояи меъёрҳои ахлоқӣ покашон кардем): - Охир, ай мардак, ман мурда истодаам дар ҳаминҷо, дар ҳар куҷо гашта истодаам. Чӣ кор кунам? О ман мемурам пагоҳ. Мурдаамро пагоҳ ҳамон ҷо мегиред... А бачаам, сил шудам, ба номи Худо. Безорам кардед. Ина кор мекунам ягон 15-20 рӯзи дигар, иншоАллоҳ, мегирам пуламро мехезаму меоям хона. Чӣ коре мекунед, бикунед, алла. Ман безорам аз ҳамин Русия ҳам, аз ҳамин дунёшам, аз ҳамин дунё ҳам безорам! Мерам хона, ёмбош мекунем, хоб мерам! Бихоҳед, ки бифаҳмед зиндагиро, биоеду бинед ҳаминҷоро! Э онаша... охир, дар болои як поли қоқ хобам. Дар як бетон! Ин чӣ гап аст? Ин чӣ ҳол аст? Мурдам аз фикру аз ғама, ки ... (инҷо гиря мардро гулӯгир мекунад) чор сӯм кор кунам, роҳӣ кунам. Ай... (инҷо наворбардор дастурхони хеле фақиронаи пеши ин мард ва либосҳои фарсудаи тани ӯро намоиш медиҳад) Нуни хӯрдагиам заҳр аст! Бутун сил шудам охир... Эҳҳҳҳ, дунёеее, мемурдам пештар, халос мешудам, ҳамон хуб буд... Охир, чӣ кор кунам? Эй бачаи ҷун, ина саро кунам? Охир, ба номи Худо қасам, ки ҳаракат дорам, даводав дорам охир, (гиря аз нав мардро инҷо гулӯгир мекунад) мерам ягонҷо кор мекунам, охир, наметиянут сӯм. Унҷаш меравӣ, кор мекунӣ, чор сӯмат медиҳанд, авқотааш мешавад. Охир, саро кунам?