Мирзиёев ишхонаси Оқсарой, қароргоҳи эса Кўксарой ëнида қурилмоқда HD

Ўзбекистон ҳукуматига яқин икки манбанинг Озодликка маълум қилишича, президент Шавкат Мирзиёевнинг янги иш жойи Оқсарой ёнида, қароргоҳи эса Кўксарой яқинида барпо этилмоқда. Қурилиш ишларига янги йилнинг илк ҳафтасида старт берилган. Ўзбекистон марҳум президенти идораси – Оқсаройни Ислом Каримов музейига¸ қароргоҳи - Кўксаройни эса Каримов истироҳат боғига айлантиришга қарор қилинган. Ясовулсиз қолган Оқсарой Озодлик манбаларига кўра, янги президент иш жойи - Тошкент марказидаги Шароф Рашидов ва Бешёғоч кўчалари орасида жойлашган Оқсарой ёнида қурилмоқда. "Оқсаройнинг ёнидан президент ишлайдиган идора қурилаяпти. Икки бино бир ҳавлида бўлиб қолади. Аппаратнинг хоздвори жойлашган ҳудудда котлован қазиш бошланди," деди Озодликнинг Ўзбекистон ҳукуматига яқин манбаси. Ислом Каримов 2 сентябрда вафот этгандан бир ой ўтар-ўтмас президент саройига элтувчи барча йўллар, жумладан Оқсарой олдидан ўтувчи катта йўл жамоатчилик қатнови учун очилган эди.