ВИДЕОИ ЧАППА КАРДАНИ ХОНАҲОИ МАРДУМ ДАР ЛУЧОБИ БОЛО: ЧАРО ИН ҚАДАР ЗУЛМ БОЛОИ МАРДУМ?

Файзулло Файзов, коргардони “Тоҷикфилм” ба нишони пуштибонӣ аз журналист Далери Имомалӣ, ки барои нашри видеоҳои тахриби хонаҳои мардум дар пойтахт аз ҷониби мақомот бозпурсӣ ва латтукӯб шуд, видеоҳои тахриби хонаҳои сокинон дар маҳаллаи Лучоби боло, дар паси Донишкадаи тарбияи ҷисмониро нашр кардааст. Тавре аз аксҳо бармеояд, тахриби ин хонаҳо рӯзи 30 майи соли 2022 сурат гирифтааст. Файзулло Файзов менависад: “Даст боло кардан бар сари Daler Imomali - ро даст боло кардан болои худ медонам. Биё, Далерҷон, "Лучоби боло" (пушти Донишкадаи тарбияи ҷисмонӣ), як гузориши дигар ва як исботи дигар кун! Аллакай 10 - 15 - сол шуд мардум зиндагӣ доранд, якҷо роҳ сохтанд, мактаб, сохтанд, хона обод карданд, барқ оварданд, об кашиданд, қарору сертификат, ҳар чӣ хоҳӣ, ҳамон вақт аз ҳукумати ноҳияи Варзоб гирифтаанд ва доранд. Акнун мақомоти 3 ноҳия барои соҳибӣ пайдо шуда, ҳар рӯз ҷанҷол ва хонагардонӣ. 10 сол пеш куҷо буд мақомот? Агар мумкин набуд, чаро дар вақташ ҳуҷҷат доданд? Чаро ба ҷои ҳуҷҷатдеҳ, мардум имрӯз азоб бояд кашад? Ва 10ҳо саволи дигар. Чанд телефонро ҳам барои аксгирӣ зада гирифтанд. Аксгирӣ ва ё видео гирифтан мумкин нест мегӯянд. Ба ҳар ҳол мо як ду намунаи хурд аз чапа карданро дорем.”