ХОҲАРИ ҚУРБОНИ ЧОЛ БАРОИ КУШТАНИ ЯК КӮДАКИ СИНФИ 2 БА 12 СОЛИ ЗИНДОН МАҲКУМ ШУД HD

Додгоҳи шаҳри Бохтар Мадинаи Аҳмад, хоҳари қумандонҳои замоне машҳур Қурбони Чол ва Султони Чолро ба қасдан расонидани зарар ба саломатӣ, ки боиси марги кӯдаки синфи 2 шудааст, гунаҳкор дониста, ба 12 - соли зиндон маҳкум намуд. Дар ин бора, Муродзода Мустафо, додраси додгоҳи шаҳри Бохтар ба “Asia-Plus” хабар дод. Муродзода Мустафо, раисикунандаи мурофиаи додгоҳии парвандаи Мадинаи Аҳмад гуфт, ки ҳукми ӯ рӯзи 23 августи соли 2022 содир шудааст. “Дар рафти мурофиаи судӣ Мадинаи Аҳмад содир кардани ҷинояти қасдан расонидани зарар ба саломатиро бар асоси моддаи 110 қисми 3-и КҶ ҶТ иқрор кард. Ҳамин тавр, дар рафти мурофиаи додгоҳӣ гуноҳи ӯ пурра тасдиқи худро ёфт ва додгоҳ ӯро 12 сол аз озодӣ маҳрум кард”, - иброз намуд Муродзода Мустафо. Ёдовар мешавем, ки Мадинаи Аҳмад, соли таввалудаш 1995, зодаи ноҳияи Кӯшониён хонандаи синфи 2-и мактаби миёнаи №8 шаҳри Бохтар Зиёдулло Розиқовро рӯзи 27-уми майи соли равон дар манзили иҷораашон бо тасмаи миёнбанди чармии мардона лату кӯб кард ва дар натиҷа, кӯдаки хурдсол ба ҳалокат расид. “Гумонбар кӯдакро лату кӯб мекунад ва баъдан ба ёрии таъҷилӣ занг мезанаду аз хона баромада меравад. Мутаассифона, кӯдак дар роҳ то беморхона мефавтад. Гумонбар баъдан худаш баргашта меояд”,- гуфта буд он вақт як манбаи огоҳ. Маҳкумшуда Мадинаи Аҳмад сабаби лату кӯби кӯдакро дар рафти тафтишоти пешакӣ шарҳ дода гуфтааст, ки Зиёдулло Розиқов, ҷияни шавҳаршавандааш аз ҳамёни ӯ 200 сомониро гирифтааст. Мадинаи Аҳмад хоҳари қумандонҳои як замон дар минтақаи Кӯлоб машҳур ва пурнуфуз Қурбони Чол ва Султони Чол аст. Мадинаи Аҳмад соли 2019 Донишгоҳи давлатии шаҳри Бохтарро хатм карда, ба ҳайси ёвари мудири мактаби миёнаи №8 и шаҳри Бохтар кор мекард. Иттифоқан дар ҳамон мактабе, ки кӯдаки аз дасти ӯ кушташуда Зиёдулло Розиқов ҳам онҷо таҳсил мекард.