ҲОҶӢ МАҲМУД СИТОРА ВА 4 ФАРЗАНДАШРО СОҲИБИ ХОНА КАРД HD

/Пресса тч/ Соҳибкори саховатпеша, роҳбари ҶДММ «Сарманзил» ва узви ҲХДТ ва вакили Маҷлиси вакилони халқи шаҳри Душанбе Маҳмудҷон Муродов ба Ситора Сафарова ва чор писари ӯ дар маркази шаҳри Душанбе манзили истиқоматӣ тӯҳфа кард. Маврид ба зикр аст, ки қаблан ҳафтаномаи «Тоҷикистон» ва сомонаи Pressa.tj аз рӯзгори пуразобу вазнин ва дар шаҳри Новосибирск бесарпаноҳ мондани фарзандони ноболиғи Ситора гузориш омода карда буд. Соҳибкор Маҳмудҷон Муродов гузориши видеоро тамошо карда, тасмим гирифт, ки ба ин оилаи эҳтиёҷманд дасти ёрӣ расонад. Аввал Ситора ва фарзандонашро аз хобгоҳи умумӣ ба хонаи иҷора кӯчонид ва ваъда дод, ки дар наздиктарин фурсат онҳоро бо хонаи истиқоматии замонавӣ таъмин менамояд. Барои писарони Ситора либоси мактабӣ харида, онҳоро дар мактаби русӣ дохил намуд. Билохир, субҳи 8-уми феврал Ҳоҷӣ Маҳмуд Ситораву фарзандонашро ба мазили навашон кӯчонид. Баъди ин қадар мушкилоту азобҳо Ситора соҳиби манзили истиқоматӣ гардид. Акнун ӯ ва чор писараш дар ин хонаи тозаву озода, барҳаво, шинам ва дорои тамоми шароит барои зисту зиндагӣ иқомат мекунанд. Дигар Ситора ба кучаҳо ба савдо намебарояд, гапшунави мардум намегардад ва дар назди одамон гардан каҷ намекунад, то пул диҳанду нон барои хӯрдан бихарад. Шодии фарзандони Ситора ҳаду канор надорад. Ҳамаашон бо либоси зебову шинам ба мактаб мераванд. Аҳли ин оилаи ранҷкашида минатдории худро ба давлату Ҳукумат ва соҳибкори саховатпешаву дурандеш Маҳмудҷон Муродов баён медоранд, ки ба онҳо дасти сахои худро дароз намуда, соҳиби хонаи истиқоматиашон гардонид. Бояд гуфт, ки хонаи истиқоматии Ситора дар маркази пойтахт (кӯчаи Ҳусейнзода 10/1, хона навбунёди замонавӣ ) ҷойгир буда, аз се ҳуҷра – меҳмонхона ва ду хонаи хоб, ки якеаш барои кӯдакон мебошад(126 метри мураббаъ), иборат аст. Манзил аз ҷониби соҳибкор бо тамоми шароити замонавӣ, аз ашёи рӯзгору хониш то таҷҳизот ва маводи мавриди ниёзи аввал таъмин карда шудааст. Ёдовар мешавем, ки Маҳмудҷон Муродов қаблан ба ду оилаи дорои имконияти маҳдуд дар кӯчаи Ҳусейнзода, № 10, 3 нафар оилаҳои ятим ва дорои шахсони имконияташон маҳдуд - Раъно Раҳимова, Фотима Убайдова ва Зебуниссо Акрам, оилаҳои камбизоат дар кӯчаи Айнии шаҳри Душанбе хона дода буд. Маҳмудҷон Муродов Хонаи кӯдакони пойтахтро бо харҷи қариб 7 миллион сомонӣ таъмир намуда, инчунин таъмири биноҳои як кӯчаро ба уҳда гирифт. Ҳамчунин, ӯ ба 150 нафар ниёзмандон, маъюбон, беморон ва оилаҳои камбизоати маҳаллаи Камоли Хуҷандӣ ва Шоҳмансур-1-и пойтахт маводи мавриди ниёзи аввал, аз қабили орд, равған, шакар, биринҷ, макарон ва ғайра кумак расонид.