«Теркæй Туркмæ Аивад» HD

Афтæ хуыйны Турчы цæрæг ирон нывгæнджыты равдыст. Абон кадджын уавæры байгом Дзæуджыхъæуы Национ музейы. Йæ амидингæнджытæ сты Турчы цæрæг ирæттæ, нæ республикæйы культурæ æмæ национ ахастдзинæдты министрадтæ. Фенæн дзы ис курдиатджын нывгæнджыты куыстытæ. Скодтой сæ алы хуызты - портреттæ, æрдзы æмæ абстрактон нывтæ. Æрластой къамисджыты куыстытæ дæр. Алчи цы равдыстмæ æнхъæлмæ кастис, уый байгом. Сырх лент алыг кодтой нæ респубикæйы сæргълæууæг Битарты Вячеслав æмæ Турчы цæрæг ирæтты æхсæнад «Аланы» сæрдар Хъуысаты Сардреттин. Ирон культурæ æмæ традицитæ кæй парахат кæны, уый тыххæй йын Битарты Вячелав æппæты кадджындæр хæрзиуæг - Ирыстоны Намысы майдан. Минæварадæн та - хицæн лæвар Шанаты Барисы скульптурæ «Чужбина», зæгъгæ. Баст у Ирыстоны рагон историйы уæззаудæр цауимæ - нæ фыдæлтæ Туркмæ куы фæлыгъдысты, уыимæ. Кадджын уазджыты номыл фæсивæд симды бацыд. Уый фæстæ музейы азæлыдысты Хетæгкаты Къостайы æмдзæвгæтæй рæнхъытæ. Равдыстмæ йæхи бацæттæ кодта национ инструментты оркестр дæр. Афтæмæй æрбацæуджытæ иу иннæйы фæдыл æмбæлдысты се `мтуг дæсныты аивадыл. Уый дын портреттæ, æрдзы æмæ абстрактон нывтæ. Къамисджыты куыстытæ. Сæ арæхстдзинад æвдисынц алы жанрты. Зындгонд фыссæджы æмдзæвгæтæн ам æрмæст сæ нывтæ фенæн нæй. Абысалты Кайа бацæттæ кодта дурынæй конд куыстытæ. Ахæм дæсныйадыл 20 азæй фылдæр хæст у. Куыд зæгъы, афтæмæй ацы экспонаттыл уæлдай цымыдисагæй куыста. Туркæй Теркмæ схæццæ кодтой 200-мæ куысты. Нывтæ, къамтæ, дурæй нывæфтыдтæ. Къуымы та цæхæртæ калынц сызгъæринæй конд дзаумæттæ. Сæ фылдæр сын сæрмагондæй ацы равдыстмæ сарæзтой. Аивадуарзджытæ сæм лæмбынæгæй кæсынц. Се `хсæн нæ республикæйы сæргълæууæг Битарты Вячеслав дæр. Фæнысан кодта, равдыстæн стыр насаниуæг кæй ис. Фыццаджыдæр - иудзинады номыл. Цы федта, уымæй разыйæ баззад. Турчы ирон диаспорæйы минæвæрттæ иууылдæр нæ сæмбæлыдысты ацы равдыстмæ. Фæлæ сæ куыстытæ уæддæр æрбацæуджыты цæсты ахадынц. Алы куыст, алы нывæн дæр ис йæхи мидис. Бирæтæ сæ цымыдисæй агурынц. Турчы цæрæг ирæтты аивад фенынмæ фыццаг бон бирæ адæм æрбацыд. Музейы къах бавæрæн дæр нал уыд. Се `ппæты фæнды не фсымæртæн æмæ се сфæлдыстадæн аргъ скæнын. Ахæм гæнæн аивадуарзджытæн уыдзæн суанг майрæмбонмæ. Гогаты Марат _ Мы рядом в: vk.com/irystontv instagram.com/irystontv youtube.com/irystontv twitter.com/irystontv