Дуучин Болор Уянга Зүрхэн Чулуу

Шүлгийг Ү. Хүрэлбаатар Хөгжмийг Г. Энхбаяр Дуучин Д. Эрдэнэцэцэг ЗҮРХЭН ЧУЛУУ Голын харгиа, шувууны жиргээ бүдгэрч Гоёлын хувцас ч дэндүү дараатай санагдана Голомтоо орхисон чам руу би Гомдол зангирсан зүрхээ чулуу болгон шидье Хэн нэг нь чамд дурласан бол Хэзээ ч билээ би чамтай Зүүдэндээ жаргасан гэж бодъё Хотын чимээ хүмүүсийн алхаа бүдгэрч Хонгор амрагийн бодол ч тээртэй санагдана Хайраа гээсэн чам руу би Хагацал амссан зүрхээ чулуу болгон шидъе Хэн нэг нь чамд дурласан бол Хэзээ ч билээ би чамтай Зүүдэндээ жаргасан гэж бодъё Үүрийн гэгээ мандах наран бүдгэрч Үүрдийн амрагийн яриа ч худлаа санагдана Үүдээ хаасан чам руу би Үйл лайтай зүрхээ чулуу болгон шидъе Хэн нэг нь чамд дурласан бол Хэзээ ч билээ би чамтай Зүүдэндээ жаргасан гэж бодъё ДУУНЫ ТҮҮХ 1998.02.10-нд “Зүрхэн чулуу” хэмээх дууны шүлгийг миний бие бичсэн юм. Тэр шүлгийг маань “хоовон” Энхбаяр олзуурхан авч ая дан хийсэн бөгөөд дуучин Д. Эрдэнэцэцэг анх дуулсан юм. Тэрбээр үүний өмнө Л. Балхжав бид хоёрын “Чамайгаа оллоо” дууг дуулсан байсан юм. Үндсэндээ хайр дурлалын хоёр туйл болох учрал, хагацлыг дуулсан гэсэн үг юм. Тэр үеийн эстрадын нэрт дуучин Д. Эрдэнэцэцэгийн бараг сүүлчийн дуулсан дуу нь “Зүрхэн чулуу” байх. Яагаад энэ дууг олж дуулсныг би мэдэхгүй. Түүний дараа Ж. Чингис дуулсан. Бүр сүүлд нь залуу дуучин Э. Болор-Уянга дуулж “Дурсъя, дуулъя” CD-ндээ оруулсан билээ. Монгол Улсын Урлагийн гавъяат зүтгэлтэн, нэрт хөгжмийн зохиолч Г. Энхбаяр “Зүрхэн чулуу” дууг Соёл урлагийн их сургуулийн дуулаачийн сургалтанд орсон гэж хэлж байсан. Тэгээд ч гурван үе дамжин одоо хүртэл дуулагдаж байхыг бодоход гайгүй бүтээл болсон юм болов уу гэж бодож явдаг даа. Яруу найрагч Ү. Хүрэлбаатар 2015.02.10. 23 цаг 28 минут