Тааттаҕа- Республика күнүн бэлиэтээһин

Саха Өрөспүүбүлүкэтин олохтоспут саха чулуу уола Былатыан Ойуунускай биир дойдулаахтара өруу буоларын курдук, бу сүҥкэн суолталаах күнү өрө көтөҕуллэн бэлиэтээтилэр. Тааттаҕа 2011 сылтан олохсуйбут үгэһинэн, муус устар 27-с күнүн Былатыан Ойуунускай төрөөбүт сиригэр-уотугар – кырдьаҕас Чөркөөххө бэлиэтииллэр. Норуот дьыл5ата түстэнэр, олох тыҥыыр кэмигэр өйдүүн-санаалыын, эттиин-хаанныын күөгэйэр күнүгэр сылдьан, саргылааҕы салайсыбыт саха чаҕылхай уолун сырдык аатыгар сүгүрүйэр, махтанар бу ытык күҥҥэ Таатта бастыҥнарыгар, үлэнэн киэркэйэр дьоһун дьонугар үрдук наҕараадалары туттардылар, ааты суолу иҥэрдилэр. Итиэннэ улуус кэскилэ Андрей Слепцов икки төгүллээн ууттан дьону быыһаабыт хорсун быһыытын иһин анал бэлиэни тутта. ЮЛИЯ ГОЛИКОВА- ЧӨРКӨӨХ ЫЧЧАТЫН ЛИДЕРЭ Тыараһа ытык дьоно Валентина Романовна уонна Василий Афанасьевич Николаевтар Ойуунускай манньыаттарын судаарыстыбаннас музейыгар бэлэх ууналларын туһунан бар дьон иннигэр өссө биирдэ бигэргэтэ, чиҥэтэ иһитиннэрдилэр. ВАЛЕНТИНА, ВАСИЛИЙ НИКОЛАЕВТАР - ТЫАРАҺА НЭҺИЛИЭГИН ОЛОХТООХТОРО Нарын талахтаах, таалар хонуулаах, тардыы тамылҕаннаах Таатта оҕото Дьаралыктыйа Былатыан киэҥ сиринэн тэлэһийэн, төрөөбүт сиригэр үктэннэҕинэ «Дорообо, алааһым, сирэм күөх алааһым!» диэн ахтылҕан иэйиилээх тылларын чуумпура истибит алаас нуһараҥ бэйэтигэр ыалдьыттар сибэкки дьөрбөлөөх сүгүрүйэ нөрүйэ уонна махтана үктэннилэр. ЖАННА БУРМИСТРОВА- КОРРЕСПОНДЕНТ « Илбис тыл туйгуна Былатыан Ойуунускай курдук чулуу киһини күн сиригэр көрдөрбүт алаас ытык сиригэр үктэнии – күн бүгүн республикабытын салайан олорор бас-көс дьоҥҥо Ойуунускай курдук дьон – норуот туһугар үлэлииргэ мэктиэ тылы биэрии курдук ылыныллыахтаах!» СТЕПАН САРГЫДАЕВ- СӨ ЫЧЧАТ ДЬЫАЛАЛАРЫГАР УОННА СОЦИАЛЬНАЙ КОММУНИКАЦИЯҔА МИНИИСТИРЭ Алаас ыалдьыттара поэт үөрэммит оскуолатыгар, буор кутугар аа дьуо ыксаабакка сылдьан, бу уоскулаҥҥа – чуумпуга дуоһуйа хааман, ону кытта сэргэ Ойуунускай олоҕун туһунан тылтан тыл ситимнэһэн- сиэттиьэн, хааһахтан хостонон эрэрдии тахсан иһэр сэргэх сэһэни болҕойо иьиттилэр. АЛЕКСАНДР АТЛАСОВ- СӨ ТЫА ХАҺААЙЫСТЫБАТЫН МИНИИСТИРЭ Ойуунускай күн сирин көрбүт балаҕанын көмүлүөк оһоҕун сыралыгар саһарчы буһар алаадьы – бу кун биир бастыҥ уонна кэтэһиилээх көстүүтэ. Манна, бу ытык балаҕаҥҥа, атах тэпсэн олорон, кэскиллээх кэпсэтиилэр саҕыллаллар. ФЕДОР БОРИСОВ- СӨ ИЛ ДАРХАНЫН УОННА БЫРАБЫЫТАЛЫСТЫБАТЫН ДЬАҺАЛТАТЫН САЛАЙААЧЧЫТА ИЗАБЕЛЛА ЖЕРГОТОВА- ЧӨРКӨӨХ МУЗЕЙЫН НАУЧНАЙ ҮЛЭЬИТЭ Ойуунускай бэйэтэ эппитинии, кини эрдэ турбут сэһэнэ, хойут турбут хоһооно буолан, үс саха үөскүүрүн, түөрт саха төрүүрүн тухары сырдык аата умнуллуо-умуллуо суоҕа. ол тухары икки атахтаах сардаҥалаах санаата саппаҕырбатын, өрөгөйдөөх өйө өһүллүбэтин!!!