Кардам туро фаромӯш шеъри Кӯҳзод Фатҳуллоҳ

КАРДАМ ТУРО ФАРОМӮШ Сад шукри Кирдугорам, кардам туро фаромўш, Доғи дигар надорам, кардам туро фаромўш. Хорам бикард ишқат, зорам бикард ишқат, Поиз шуд баҳорам, кардам туро фаромўш. Баҳри чӣ, эй ситамгар, бо чашми аз алам тар, Бошӣ ту интизорам, кардам туро фаромўш. Дар рўзи зодрўзат, чун ёри дилфурўзат Гулдастае наорам, кардам туро фаромўш. Бар соқи дасти нармат, болои рўйи гармат Ман лаб намегузорам, кардам туро фаромўш. Дар кўчаву хиёбон, дигар ман аз дилу ҷон Дастат намефишорам, кардам туро фаромўш. Не қадри ман шиносӣ, не қадри шеъру ишқам, Акнун ба ихтиёрам кардам туро фаромўш. Бар пеши ту дубора, бо илтимосу зора, Ман сар намефарорам, кардам туро фаромўш. Бе ту кунун ҷафоҷў, эй бадсиголу бадхў, Тинҷ аст рўзгорам, кардам туро фаромўш. КӮҲЗОД ФАТҲУЛЛО