От Матфея Святое Евангелие : Глава 7. [На церковно-славянском языке]

Глава 7. Зачало 20. 1 Не судите, да не судими будете: 2 имже бо судом судите, судят вам: и въ нюже меру мерите, возмерится вам. 3 Что же видиши сучец, иже во оце брата твоего, бервна же, еже есть во оце твоем, не чуеши? 4 Или како речеши брату твоему: остави, да изму сучец из очесе твоего: и се, бервно во оце твоемъ? 5 Лицемере, изми первее бервно из очесе твоего, и тогда узриши изъяти сучец изъ очесе брата твоего. 6 Не дадите святая псом, ни пометайте бисеръ ваших пред свиниями, да не поперут их ногами своими и вращшеся расторгнут вы. 7 Просите, и дастся вам: ищите, и обрящете: толцыте, и отверзется вам: 8 всяк бо просяй приемлет, и ищяй обретает, и толкущему отверзется. 9 Или кто есть от вас человек, егоже аще воспросит сын его хлеба, еда камень подаст ему? 10 Или аще рыбы просит, еда змию подастъ ему? 11 Аще убо вы, лукави суще, умеете даяния блага даяти чадом вашим, кольми паче отец ваш небесный даст блага просящим у него. 12 (Зачало 21) Вся убо, елика аще хощете, да творят вам человецы, тако и вы творите им: се бо есть закон и пророцы. 13 Внидите узкими враты: яко пространная врата и широкий путь вводяй в пагубу, и мнози суть входящии им: 14 что узкая врата, и тесный путь вводяй в живот, и мало их есть, иже обретаютъ его. 15 (Зачало 22) Внемлите же от лживых пророк, иже приходят к вам во одеждах овчих, внутрь же суть волцы хищницы: 16 от плод их познаете их. еда объемлютъ от терния грозды, или от репия смоквы? 17 Тако всяко древо доброе плоды добры творит, а злое древо плоды злы творит: 18 не может древо добро плоды злы творити, ни древо зло плоды добры творити. 19 Всяко убо древо, еже не творит плода добра, посекают е и во огнь вметают. 20 Темже убо от плод их познаете их. 21 (Зачало 23) Не всяк глаголяй ми: господи, господи, внидет в царствие небесное: но творяй волю отца моего, иже есть на небесех. 22 Мнози рекут мне во он день: господи, господи, не в твое ли имя пророчествовахом, и твоимъ именем бесы изгонихом, и твоим именемъ силы многи сотворихомъ? 23 И тогда исповем им, яко николиже знахъ вас: отидите от мене, делающии беззаконие. 24 (Зачало 24) Всяк убо, иже слышит словеса моя сия и творит я, уподоблю его мужу мудру, иже созда храмину свою на камени: 25 и сниде дождь, и приидоша реки, и возвеяша ветри, и нападоша на храмину ту: и не падеся, основана бо бе на камени. 26 И всяк слышай словеса моя сия, и не творя их, уподобится мужу уродиву, иже созда храмину свою на песце: 27 и сниде дождь, и приидоша реки, и возвеяша ветри, и опрошася храмине той, и падеся: и бе разрушение ея велие. 28 И бысть егда сконча иисус словеса сия, дивляхуся народи о учении его: 29 бе бо учя их яко власть имея, и не яко книжницы (и фарисее).