ҲАМЛА БА ШОИРАИ ШИНОХТА АДИБАИ АЗИЗ

Раёсати корҳои дохилии пойтахти Тоҷикистон хабар дод, ки сокини 30-сола шаҳри Душанбе Шералӣ Кенҷаев бо ҷурми ҳамла ба шоираи шинохта Адибаи Азиз ба 5 шабонарӯзи ҳабси маъмурӣ маҳкум шудааст. Додгоҳ ӯро бар асоси моддаи 460-уми Кодекси ҳуқуқвайронкуниҳои маъмурии Тоҷикстон дар майдаавбошӣ гунаҳкор донистааст. Раёсати корҳои дохилӣ гуфт, Шералӣ Кенҷаев шаби 18 ноябр дар кӯчаи Анзоб ба Адибаи Азиз дарафтода, нисбаташ рафтори дағалона кардаву бо суханони қабеҳ шаъну шарафи ӯро паст задааст. Адибаи Азиз дар суҳбат бо сомонаи “Бомдод” гуфт, он шаб бо либоси хонагӣ барои харидани нон берун баромада буд, вале дар роҳ як мошин аз пасаш таъқиб кард. Ронанда ба Адиба бо дашномҳои қабеҳ таҳдид кардааст, ки ё пул бидиҳад ваё ба мошинаш савор шавад. Адибаи Азиз гуфт, ба ҳамлагар пулҳояшро доду халос хӯрд, вале аз он рӯз ба баъд то замони боздошти ин одам аз тарс аз хонааш берун намебаромад. Баъди эълони ҳукми Шералӣ Кенҷаев, Адибаи Азиз дар Фейсбук навишт, ки фақат ба хотири гиряву зорӣ ва таваллои модараш ин нафарро бахшид ва ба муҷозоти шадидтараш пойфишорӣ накард.