КУШТОР ДАР РӮИ ҶОЙНАМОЗ HD

Бино ба иттилои манобеи пойгоҳи хабарии “Бомдод”, шаби 3 декабр Ҳоҷӣ Баҳрибой Тӯпалов, сокини 64-солаи деҳаи Пушти Қӯрғони ҷамоати Моғиёни шаҳри Панҷакентро ҷияни худаш Абдурашид Оймаҳмадов бо як бераҳмии махсус дар болои ҷойнамоз ба қатл расондааст. “Ҳодиса тақрибан соати даҳи шаби 3 декабр дар хонаи духтари Ҳоҷӣ Баҳрибой, ки ҳамсари бародари Абдурашид буд, рӯй додааст. Абдурашид, ки дар ҳолати мастӣ қарор дошт, вақти намози хуфтанро хондани тағояш ба вай аз пушт ҳамла оварда, Ҳоҷиро аз пой меафтонад ва бо мушту лагат гардану қабурғаҳои мӯсафедро мешиканад. Танҳо баъди ин Абдурашид баромада, хабар медиҳад, ки мурдаи Ҳоҷӣ Баҳрибойро бигиред”, - нақл кард як сокини деҳаи Пушти Қӯрғон ба пойгоҳи “Бомдод”. Абдурашид Оймаҳмадов, соли таваллудаш 1991, ҳоло дар тавқифгоҳи ШВКД шаҳри Панҷакент қарор дорад. Ба зидди ӯ бар асоси моддаи 104 Кодекси ҷиноятии Тоҷикистон парвандаи ҷиноятӣ кушодаанд. Ба ӯ барои қатли тағояш то 15 соли зиндон таҳдид мекунад, вале агар ин куштор бо бераҳмии махсус ҷамъубаст шавад, он гоҳ қотилро то 25 сол ҳукми зиндон мунтазир аст. Ба гуфтаи ҳамдеҳагон, Абдурашид дар ягон ҷо кор намекард ва зиёд машрубот менӯшид. “Ҳоҷӣ Баҳрибой як одами хоксору диндор буд ва бо деҳқонӣ рӯзашро пеш мебурд. Он кас, ҳарчанд ба Абдурашид тағои ӯгай мешуд, вале ҳамеша ӯро насиҳат мекард, ки шаробнӯширо бас кунад, ба роҳи рост пой монад. Абдурашид чанд дафъа ба духтари Ҳоҷӣ Баҳрибой, ки ҳамсари бародараш ҳам буд, гуфта будааст, ки ҳамин насиҳатҳои падарат ҳеҷ намефорад ба ман, кадом рӯз падари насиҳатгаратро мекушам барои насиҳатҳояш”, - нақл карданд сокинони Пушти Қӯрғон дар суҳбат бо “Бомдод”.