Иманғали Тасмағамбетов Қазақстандықтарға Үндеу Жасады HD

Қазақстанның экс-премьері, саяси қайраткер Иманғали Тасмағамбетов елде болған террористік оқиғаларға байланысты үндеу жариялап, марқұмдардың отбасына көңіл айтты, деп хабарлайды Stan.kz ақпарат агенттігі Abai.kz порталына сілтеме жасап. Ағайындар, бауырлар, азаматтар! Осынау қаңтардың қаһарлы күндері елімізде, оның ішінде айналайын ақ Алматымыздың басына түскен қаралы күндері орын алған дүрбелеңде өздеріңізге үн қатуды азаматтық парызым деп білемін. Өкінішке қарай, осы күндері қаза тапқан азаматтар аз емес. Олардың отбасылары мен жақындарына қайғырып көңіл айтамын. Имандары жолдас болсын. Сөз жоқ, біздің ел – ежелден еңбек пен ерлікті, жігер мен ерікті ту еткен текті халық. "Бас кеспек бар болса да, тіл кеспек жоқ" деп өз тілегін тілімен, сөзімен жеткізген жұрт. Сондықтан да бұл күндері кей өңірлерде басталған шерулер бейбіт сипатта, әділетті талаппен болды. Десе де, арнайы дайындалған арандатушылар мен содырлар жағдайды пайдаланып кетті. Салдарынан "Тәуелсіздіктің тал бесігі" саналатын алып шаһарды қантөгістің алаңына айналдырды. Бұл жай ғана қылмыс емес. Бұл – жауыздық! Отанға, Тәуелсіздікке жасалған опасыздық! Қарапайым азаматтарымызға жасалған қатыгездік! Мұндайда ел болашағы үшін жауапкершіліктің ауыр жүгі Мемлекет басшысының мойнында. Ал дәл қазір Президент – әр азаматтың, әр отбасының, тұтас қоғам қауіпсіздігінің жалғыз кепілі! Осы орайда, мен барша қазақстандықты мемлекет басшысы Қасым-Жомарт Тоқаевқа қолдау көрсетуге шақырамын! Біз қай жерде туып, қай өңірде жүрсек те, бір атаның баласымыз. Қарға тамыр қазақпыз! Мен күшті де қуатты, әсем де әлеуетті мемлекеттің ертеңіне сенемін! Аман болайық! Ел бірлігі мен берекесін сақтайық, ағайын! Сілтеме: https://stan.kz/byl-otanga-zhasalgan-opasizdik-imangali-tasmagambetov-k-358204/