Туркия, ана сизга ўзбек қизи: 19 ёшда гинеколог, таэквондочи ва яна мураббий - BBC Uzbek

Барно Сафар бор-йўғи 19 ёшда. Шунча нарсага шу ёшда муҳожиратда эришган. Туркияда туғилган. Оиласи, чорак асрдирки, Туркиядан бошпана топиб келади. Аммо, шунга қарамай, аллақачон қатор халқаро турнирлар ғолиби. Ўнлаб шогирдларга эга мураббий. Яна Туркиянинг ўзида акушер-гинекологликка ўқиб, иш тажрибасини ҳам бошлаб юборган. Барно бир кун келиб она Ватани - Афғонистонга қайтмоқчи. Аёллар учун фақат аёллар касалхонасини очмоқчи. Ўзи ҳам таэквондочи бўлган отасининг айтишича, қизи деб яқинларидан озмунча гап эшитмаган. “Қиз болани спортга бериб, нима қилмоқчисан?”, - деган дағдағаларга юз тутган. Аммо, отасига кўра, буларнинг ҳеч бирини писанд билмаган. Фарзандини ўз Ватанига хизмат қиладиган инсон қилиб етиштириш аҳдида қатъий қолган. Барно оиладаги уч фарзанднинг тўнғичи. Ҳали мактабда таҳсил олаётган бир синглиси ва укаси ҳам бор. Ота-онаси Туркияда тикувчилик қилишади, кичиккина бир корхоналари ҳам бор. Асосан ўз миллий либосларини тикиб сотишади, шунинг орқасидан тирикчилик қилишади. Туркиядаги афғон қочқинларининг сони ҳозир бир неча юз мингга нисбат берилади. Улардан аксариятини Афғонистоннинг аксарият Марказий Осиё давлатларига чегарадош шимоли ва шимоли-шарқидан қочиб бораётган ўзбек, туркман ва қирғизлар ташкил этиши айтилади. Турк ҳукуматининг ортга депортация қилиш ҳаракатларига қарамай, айниқса, сўнгги йилларда Туркияга юз тутаётган афғонлар сонининг кескин ортиб бораётгани кузатилади. Шу пайтгача энг катта сондаги афғон қочқинлари асосан икки минтақа давлати – Эрон ва Покистондан бошпана топиб келишган. Уларнинг сонлари яқин-яқингача бир неча миллионга нисбат бериб келинган. Лекин сўнгги икки-уч йил ичида бу давлатлар ҳатто зўр билан бўлса-да, бу қочқинларни катта сонда ортга қайтариш ҳаракатига тушиб қолишган. Вазиятга бир эмас, бир неча бор Бирлашган Миллатлар Ташкилотининг аралашишига ҳам тўғри келган. Барно билан мухбиримиз Фазл Аҳмад Ёлғуз учрашган ва мана бу видеолавҳани тайёрлаб юборган... BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek