“Ўрикзор”да стоянка нархи ўн минг сўмга кўтарилганидан тадбиркорлар норози бўлмоқда HD

Тошкент шаҳрининг “Ўрикзор савдо комплекси”даги тадбиркорлар бозорга юк олиб кирадиган автомобилларга кириш нархи ўн минг сўмга чиқиб кетганидан шикоят қилмоқда. Уларнинг айтишларича, бу тўлов эвазига ҳеч қандай квитанция берилмайди. Янги йил арафасида стоянканинг ярми бўлиниб ёпиб қўйилганидан сўнг, бозорга автомобилда кириш яна ҳам мушкуллашди. “Ўрикзор савдо комплекси”да савдо қиладиган бир гуруҳ тадбиркорлар бозор маъмуриятининг автомобилларнинг бозорга кириши учун йиғиладиган пул миқдори ошиб бораётганидан шикоят қилди: “Бизнинг Ўрикзордаги бозор стоянкасида ҳар куни тўполон. Олдин ставкамиз соати 2000 сўм эди, дўкончилардан эса мол олиб киргани учун 5000 сўм оларди. Бунисига ҳам кўнувдик. Энди эса шунинг нархи 10 минг сўмга чиқди. Стоянкачилар ўзларига хон, ўзларига бек. На бир чек беради, на бир қоғоз. Тасаввур қилинг бир ойда 300 минг сўм битта стоянкани ўзига берамиз”, деди тадбиркорлардан бири.