Шавкат Мирзиёев Тошкентда, ‘Ўзбекистон президенти билан учрашувдан Оқ Уйнинг кўнгли тўлди’

Ўзбекистон янги президентининг Вашингтонга илк расмий ташрифи манзарасидаёқ томонлар икки ўртада “стратегик шерикликнинг янги даври бошлангани” ҳақида эълон қилишди. Шавкат Мирзиёев Америка томонини Ўзбекистондаги ўзгаришлар бардавом эканига ишонтиришга уринди. Ислоҳотлар йўлидан қайтмасликларини уқтирди. Аён бўлишича, Оқ Уйда янграган бу баёнотлар АҚШ Давлат Департаменти, Конгресси, Пентагон – Мудофаа вазирлиги ва Жаҳон Банкида ҳам ижобий акс-садо берган. Америка томони, таъбир жоиз, якунида расмий Тошкентнинг бу ваъдалари ижросига умидбахш бир кайфиятда қолган. “АҚШ ва Ўзбекистон ўртасидаги стратегик шерикликни янги босқичга кўтаришга оид” қўшма баёнот имзоланган. Томонлар орасидаги илк экани айтилаётган беш йиллик ҳарбий режа пишитиб олинган. Кутилганидан бироз кам эса-да, умумий қиймати 5 миллиард АҚШ долларига яқин шартномаларга имзо чекилган. Оқ Уйдан шахсан президент Дональд Трампнинг ўзи кузатиб қўйган президент Шавкат Мирзиёев кеча – 17 май куни Тошкентга қайтган. Ўзбекистон президентининг расмий ташрифи ҳақида Дональд Трамп хос расмий баёнот билан ҳам чиққан, ўз “анъанаси”га содиқ қолган ҳолда “твит” қилишни ҳам унутмаган. Томонлар бир-бирларига керак стратегик шериклар мақомида хайрлашишган. Бу – Ўзбекистон раҳбарининг 16 йил деганда Оқ Уй – Вашингтонга илк расмий ташрифи эди. “Ўзбекистон ҳукумати учун Америка билан алоқалар бугун нақадар муҳимлигини, мулоқотлар чоғида тилга олинган мавзулар, ҳамкорлик ваъдалари, бунинг ортида турган омилларнинг қанчалик долзарблигини, энди, вақт кўрсатади”, - дейди Вашингтондан Би-би-си Ўзбек Хизмати билан суҳбатида президент Шавкат Мирзиёевнинг расмий ташрифини яқиндан ёритган журналист Навбаҳор Имамова. “Ҳозирча, шуни айтишимиз мумкинки, стратегик ҳамкорлик қоғозда ва кўнгилда. Музокараларни эса, самимий кечди, деган бўлардим”. Би-би-си Ўзбек хизматининг видеоларини www.bbcuzbek.com да ҳам кўришингиз мумкин.