Тожикистон милицияси ўз фуқароларини ўлдирмоқда HD

Тожикистон милицияси ўз фуқароларини ўлдирмоқда "Паймон" сайтининг берган маълумотига кўра, "Вахдат милиция бўлими ходимлари икки фарзанднинг отаси бўлган бир фуқарони милиция бўлимининг ўзида ўлгунча калтаклашган. Калтак натижасида вафот этган марҳумни эса "ўз жонига қасд қилди" деб кўрсатмоқчи бўлишган." Икки фарзанднинг отаси бўлган бу фуқаро, кимдир унинг номига паспорт расмийлаштириб, Сурияга кетганлиги сабабли гумондор шахс сифатида қўлга олинган эди. Милиция ходимлари, Сурияга борган одам айнан унинг ўзи эканлигини, ёки ўзининг ҳужжатларини билиб туриб, қасддан бошқа бировга берганлигини айблов сифатида унинг бўйнига қўймоқчи бўлишган. Уч кун давом этган қийноқлардан сўнг у вафот этган. Вахдат ИИБ нинг билдиришича, марҳум гўё ўзини ўзи осган эмиш. Марҳумнинг дафн маросими милиция назорати остида, шошилинч равишда ўтказилган. Унинг қариндошларига эса, аза тутиб, ўлганга йиғлаш тугул, жасадни дафнга тайёрлашга ҳам рухсат беришмаган. ИИВнинг расмий сайтида бу нохуш ҳодиса ёритилмай қолиб кетди. Қолаверса, бу маҳаллий милициянинг биринчи зўравонлиги эмас. Ўтган йилнинг сентябрь ойида , худди шу Вахдат туманида, милиция ходимлари 23 ёшли Умар Бобожоновни ҳам ўлгунча калтаклашган эди. Умар Бобожоновнинг оиласи берган маълумотга кўра, Умар шафқатсиз равишда калтакланганидан сўнг, оғир ҳушсизлик ҳолатига тушиб қолган. Касалхонага келтирилгач, ўзига келмасдан жон таслим қилган экан. Ўшанда, погонли қотиллар ўзларини оқлаш учун, « йигитнинг ўзи йиқилиб тушиб, боши билан йўлакнинг бетонли ҳошиясига урилиши натижасида вафот этди», дея майнавозчилик қилишган эди. Ҳокимият кундан кунга қонхўрлашиб бормоқда. Полиция ва ҳарбийларнинг оддий халққа нисбатан қилаётган зўравонликлари ҳеч қандай жазосиз қолиб кетмоқда. Қачонгача Тожикистон халқи И.Раҳмон ҳокимиятининг зулмидан жабр тортади? Бу мустабид ҳокимнинг зулмидан бизни ким қутқаради?