‘Ўзбекистонга жудаям боргилари келади, имконияти бўлса, шу бугун кетишади’

Асли ўзбекистонлик журналист Нарзулло Охунжоновнинг айтишича, туркияликлар орасида Ўзбекистонга бориш, у ердаги муқаддас қадамжоларни зиёрат қилиш истаги худди ана шундай. “Бундай кайфиятда бўлган инсонлар жудаям кўп. Чунки биргина виза бекор қилинганидан кейин, мисол учун, одамларда ўзимизнинг ота юртимиз – Ўзбекистонга бориб, бемалол қадам қўйиб, зиёрат қилиш имконияти юзага келди, деган бир ишонч пайдо бўлди”, - дейди у. Туркия Президенти Ражаб Таййип Эрдўғаннинг куни-кеча Тошкентга қилган давлат ташрифи чоғида эса, масъул томонлар айнан зиёрат туризмини ривожлантириш масаласида ҳамкорлик қилиш борасида келишиб олишди. Бу хусусда расман меморандум ҳам имзолашди. “Энди Туркия, бутун туркий халқларнинг, менимча, Ўзбекистонга бўлган интилишлари янада кучаяди. Самолётдами, бошқа транспорт воситаларидами, имконияти бўлса, уларнинг шу бугун Ўзбекистонга кетиш нияти бор-да”, - дейди маълум муддат Туркияда истиқомат қилган бу суҳбатдошимиз. Янги президенти Шавкат Мирзиёев бошчилиги остида Ўзбекистон раҳбарияти ўзининг асосий эътиборини мамлакатнинг сайёҳлик потенциалини кучайтиришга қаратган. Бу ишга шахсан президент Мирзиёевнинг ўзи бош қўшган. Шавкат Мирзиёев Ўзбекистон тарихида “Сайёҳлик мамлакат учун пахта етиштиришдан кўра фойдали” эканини эътироф этган биринчи давлат раҳбари ҳам бўлган. Мамлакат тарихида зиёрат туризми атамаси ва айни шу турдаги сайёҳликни ривожлантириш масаласи айнан президент Шавкат Мирзиёев бошқаруви остида илк бор истеъмолга кириб келган, эътибор топган. Би-би-си Ўзбек хизматининг видеоларини www.bbcuzbek.com да ҳам кўришингиз мумкин.