Акбар Жўраев икки кураш натижасига кўра 430 кг тошни бўйсундирди #AkbarJurayev #OlympicChempion HD

Томошабинларга чинаккам унутилмас онларни тақдим этиб келаётган, маҳорат ва матонат майдони бўлган Токио-2020 Олимпия ўйинларида мамлакатимиз шанини муносиб ҳимоя қилаётган спортчиларимизнинг эришаётган ютуқлари кўзни қувонтиради. Бугун баҳсларга киришган 6 нафар ҳамюртларимиз ғолиблик учун кураш олиб борди. Хусусан, оғир атлетикачимиз Акбар Жўраев беллашувларда ўзбек ўғлонининг нималарга қодир эканини амалда исботлаб, рақиблари устидан зафар қучди. Айтиш керакки, Жўраев икки кураш натижасига кўра, 430 кг тошни бўйсундириб, Олимпиада рекордини қайд этди. У ҳар бир чиқишида рақибларининг хатти-ҳаракатларини синчклаб кузатиб, ўрганиб борди. Эркаклар ўртасида -109 кг вазн тоифасида баҳсларга киришган Акбарга асосий рақиб — арманистонлик Симон Мартиросян бўлди. Симон юқори тайёргарликка эга эканини амалда намоён этган бўлса-да, Акбар Жўраевга бас келолмади. Шундай қилиб, Акбар Жўраев делегациямиз ҳисобига иккинчи олтин медални тақдим этиб, ўзига билдирилган ишончни муносб оқлади. Токио-2020 Олимпия ўйинларининг Юнон-рум кураши бўйича эркаклар ўртасидаги баҳслар ҳам қизғин кечди. 87 кг вазн тойифасида гиламга тушган ҳамюртимиз икки карра жаҳон чемпиони Рустам Ассакалов чорак финал баҳсини ўтказди. Бокс бўйича ўтказилаётган беллашувларда 63 кг вазн тоифасида ринга кўтарилган Элнур Абдураимов арманистонлик боксчини мағлуб этишга ҳаракат қилди. Рақибига қарши ўзининг бор имкониятини ишга солиб, ғолиблик учун кураш олиб борди. Яна бир боксчимиз Шаҳобиддин Зоиров ҳам чорак финал баҳсларини ўтказди. Ринга кўтарилган ҳамюртимиз филиппинлик боксчига қарши жанг олиб бориб, имкониятларини чин маънода синовдан ўтказди. Умуман олганда Токио-2020 Олимпия ўйинларида иштирок этаётган спортчилар табиийки, юқори тайёргарликка эга, ўз соҳасининг етук мутахассислари ҳисобланади. Бу эса ғалаба осонлик билан қўлга киритилмаслигидан далолат беради. Бу ерда чинаккам матонат, маҳорат ва тажриба қўл келади. Айни пайтда мамлакатимиз шаънини ҳимоя қилаётган вакилларимиз мана шу масъулиятдан келиб чиқиб, ғолиблик учун кураш олиб бормоқда.