Эркинжон Турдимов: Пул ювиш нима дегани? HD

Самарқанд вилояти ҳокими Эркинжон Турдимов айрим туманлар ҳокимлари ёки мутасадди раҳбарлари қурилиш ишларини баҳона қилиб, яхшигина “пул юваётгани”ни катта йиғилишда, минг кишининг олдида айтди: ‒ Заводда килоси 500 сўм сотилаётган цементни фирмадан 780 сўмдан сотиб олаётганини, банклар ҳам шиппиллатиб бу пулни кўчириб берааётгани яхши биламиз. Халқнинг пулини туя қилишларига йўл қўйиб қўймаймиз! Эркинжон Турдимов бу “мойка” қайси туманларда бўлаётганини ҳам очиқ айтди. Мен бошқа нарсани тушунмайман: “каттаконлар”нинг куни ўтмайдими цементдан ҳам “соққа” қилмаса, бечораларнинг куни цементга қолганми? Машинанинг зўри сеники бўлса, давлат берган уйнинг зўри сеники бўлса, одамлар эшигингдан эркин кириб келолмаса, истаган одамингга қўлингни чўзсанг, қаерга борсанг, давранинг тўри, таомнинг зўри сеники бўлса, сенинг уйингда газ ўчмаса, свет ўчмаса, хотининг бизнинг хотинга ўхшаб, қўшни қишлоқдан челаклаб сув ташимаса, бизнинг хотинлар туш кўрадиган иссиқ сув, совуқ сув сенинг хотинингда бўлса, хотининг бизнинг хотиндай таппи тезак ёпмаса, ахир сенга яна нима керак? Сенга нима етмайди? Қўлингни шу цементга ҳам булғамасанг нима қилади? Э, шунча имтиёзни сенга бериб қўйганига шукур қилиб, қўлингни булғамай, халқни рози қилиб, тепангдаги раҳбарингнинг олдида ҳам, эртга Аллоҳнинг олдида ҳам юзинг ёруғ бўлиб, маза қилиб ишламайсанми? Мана, бизлар пора олмасдан, халқнинг пулига кўз олайтирмасдан бир умр яшадик, бир жойларимиз қичиб кетаётгани йўқ-ку? Сенга нима бўлган? Ё Эркинжон Турдимов қўлингни кесса тинасанми?