Туркия лираси нима учун қадрсизланaяпти? HD

Ўтган ҳафта мисли кўрилмаган даражада қадрсизланган турк лираси душанба куни долларга нисбатан яна 7 фоизга арзонлади. Хўш, нима сабабдан иқтисодий динамикаси ва қулай географик жойлашуви олқишланиб келинган давлат миллий валютаси бундай муаммога дучор бўлди? Ушбу муаммо келиб чиқишида мамлакат иқтисодини 15 йиллик ҳукмронлиги давомида тубдан ўзгартирганини иддао қилиб келаётган Туркия президенти Режаб Тоййип Эрдўғон ҳукуматининг роли қандай? Лира нима учун қадрсизланаяпти? Турк лираси энг ёмон натижа кўрсатаётган йирик валюталардан бирига айланди. Ўтган йилга солиштирганда, ушбу валюта 40 фоизга қадрсизланди. Беш йил олдинги курслар эса лира қанчалик тез суратда қадрсизланганини кўрсатади: беш йил олдин бир доллар 2 лирага тенг бўлган бўлса, душанба куни бир доллар 6,9 лирага сотилди. Туркия валютаси заифлигининг бир неча сабаби бор. Кейинги ҳафталарда Туркия ва АҚШ ўртасидаги тортишувлар барчанинг эътиборини ўзига қаратди. АҚШ Давлат департаменти Туркия шимолий каролиналик пасторни қўлга олгани учун мамлакатга қарши санкцияларни жорий қилди. Бу ҳолат биржа бозорларини хавотирга солди. Ўтган ҳафтада ушбу масалани ҳал қилиш учун Вашингтонда ўтказилган музокаралар самарасиз якунланди.