Өзбекстандын көчөттөрү контрабанда жолу менен кирип атабы? HD

Кадамжай районунун Марказ айыл өкмөтү тээ союз мезгилинен бери эле көчөт өстүргөн багбандардын мекени катары белгилүү. Ошол учурда бул аймак мамлекеттик питомник болуп турган. Мөмөлүү жана мөмөсүз дарактардын көчөттөрүн даярдаган багбандар азыркы учурда да көчөт өстүрүүнү улантып келишет. 34 жаштагы Нурлан Абдивохидов жылына 100 миң даанага чейин көчөт сатат. Ал багбанчылыктын сырын атасынан үйрөнүп, жаштайынан эле көчөттөрдүн арасында чоңойгон. Эми болсо, бул өнөрүн үй-бүлөлүк бизнеске айлантып алды. Жыл сайын февраль айынан тартып, бир ай бою кошуналары сыяктуу каарманыбыз да жол боюнда көчөт соодасы менен алектенет. Андан тапкан кирешеси миллион сомду чамалайт экен. Бирок кошуна Өзбекстандан кирген көчөттөр соодага тоскоолдук жаратып жаткандыгын айтышууда. Жылына 3 млн даанага чейин көчөт сатылып келген болсо, акыркы 10 жылдан бери импорттун айынан зыянга учурашууда. Мындан улам бийликтен бул маселени чечип берүүсүн суранышты.