Кусæг балц - районтыл

Цæгат Ирыстоны хицауады сæрдар Тускъаты Таймураз кусæг балцы ацыд республикæйы районтыл. Бæрæг кæны, социалон нысаниуæг кæмæн ис, уыцы объектты арæзтад. Куыстытæ цæуынц федералон бюджеты фæрæзтæй. Хицауады сæрдаримæ кусæг балцы уыдис не сфæлдысталон къорд дæр. Мидæгæй – нырыккон домæнтæн дзуапдæттæг кълæстæ, æддейы бирæфадатджын спортивон фæз. Уый фидæны. Ныр та уал 500 сæдæ бынатæн ног скъолайы арæзтад йæ тæмæны бацыд. Тускъаты Таймуразæн æвдисынц объект цы хуызæн уыдзæн уый. Аразынц æй федералон программæмæ гæсгæ. Ног бæстыхай фæзындзæн 42-æм скъолайы уавæрыл дæр. Ныртæккæ дзы ахуыр кæны 1600 адæймаджы. Иннæ скъолатимæ абаргæйæ, дзæвгар фылдæр. Объект куы сцæттæ уа, уæд скъоладзауты иу хай ахуыр кæндзысты ног бæстыхайы. Уыцы цаумæ иууылдæр зæрдиагæй æнхъæлмæ кæсынц. Уæдмæ та уал арæзтадон куыстытæ цæуынц фæткмæ гæсгæ. Ай та у фидæны къалбас æмæ хъæбынтæ кæм уаддзысты, ахæм цех. Сæ продукци уæй кæндзысты канд бынæттон фæлхасгæнджытæн нæ, фæлæ ма сыхаг регионтæн дæр. Хæстæгдæр рæстæг куыстытæ фæуыдзысты, а-дыууæ боны ног кусæнгæрзтæ баласдзысты. Инвестицион проекты аргъ 56 милуан сомы у. Цех скусдзæн сентябры. Тускъаты Таймураз фæбæрæг кодта проект республикæйæн пайда кæй у. Республикæйы цæуы спортивон объектты арæзтад дæр. Дзæуджыхъæуы Хъесаты Колкайы нымыл уынджы доныбыл та августы сырæздзæн ног физкультурон-дзæбæхгæнæн комплекс. Уыдзæн гом арвы бын. Уыдзæн дзы футболон æмæ баскетболон фæзтæ, дугъгæнæн рæгътæ. Адæмæн дзы сараздзысты 300 бадæн бынаты, уыимæ дзы æвæрд æрцæудзæн тренажертæ дæр. Проектыл схардз кæндзысты 19 милуан сомы. Районтæ дæр рохуаты нæ баззадысты. Уым дæр аразынц хъазæн фæзуæттæ, цалцæггонд цæуынц спортивон залтæ. Зæгъæм Мичуриныхъæуы скъола. Ам ахуыр кæны 200 скъоладзауы. Ахуыргæнæндоны базилдзысты хъармгæнæн æмæ вентиляцион системæтæм, электрон тыхы телты æдасдзинадмæ. Аиппытæ аиуварс кæндзысты фæззæджы. Ныр та уал ивд æрцыд бæстыхайы сæр. Тускъаты Таймураз æркаст доны былгæрæттæ фидаргæнæн куыстытæ куыд цæуынц, уымæ. Бæстон æрдзырдтой Хайдоны, Хæзныдоны, Хæтæлдоны æмæ Урухы цæугæдæтты уавæрыл. Се сфидар кæнынæн æхца радих кодтой Федералон программæмæ гæсгæ. Куыстытæ хъуамæ фæуой бæлвырд æмгъуыдæй раздæр. Æдæппæтæй Тускъаты Таймураз бабæрæг кодта 16 объекты. Кусæг балцы премъер федта культурон нысаниуæг кæмæн ис, уыцы объекттæ сног кæныныл куыд архайынц. уый. Зæгъæм, Алагиры аргъуаны цæуынц цалцæггæнæн куыстытæ. Йæ рæсугъд æддаг бакаст фыдыбæстæйы хæсты фæстæ аивта. Ныр æй федералон программæмæ рацараздзысты æмæ уыдзæн, ивгъуыд æнусты куыд уыд, афтæ. Куыстытæ фæуыдзысты фæззæджы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv