Йæ цардæй ахицæн Кæсæг Балхъары, Цæгат Ирыстоны æмæ Абхазы сгу

Йæ цардæй ахицæн Цæцæны республикæйы æппæты уарзондæр, Кæсæг-Балхъары, Цæгат Ирыстоны æмæ Абхазы сгуыхт æмæ Уæрæсейы адæмон артист Дагун Омаев. 60 азæй фылдæр лæггад кодта Цæцæны республикæйы драмон театрæн, уыимæ йæ зонынц æмæ уарзынц канд Кавказы республикæты нæ, фæлæ Уæрæсейы дæр. 200 сурæтæй фылдæр сарæзта театр æмæ кинойы Дагун. Йæ рольтæ уыдысты бирæвæрсыг æмæ се ппæты дæр бæрæг дардта артисты стыр курдиат. Йæ фыццаг роль уыд кинонывы "Костры на башнях", уый фæстæ «Жизнь, ставшая легендой», «Горская новелла», «Буйный Терек», «По следам Карабаира», «Кольцо старого шейха», «Легенда горы Тбау» æмæ бирæ æндæртæ. Йæ фæстаг роль кинойы, уый дæр уыд Цæгат Ирыстоны - киноныв "Тэли æмæ Толи". Театры дæр ахъазыд бирæ рольты. Сарæзта Островскийы Павка Корчагины æмæ Шекспиры "Ромео æмæ Джульеттæ"-йы Лоренцойы сурæттæ дæр. Цард у театр, уый Дагун йæхиуыл банкъардта. Йæ бинонтæ уыдысты департацигонд, фæлæ æххормаг бонтæ нæ асастой сабийы ныфс, йæ курдиат та йын радта цардмæ фæндаг. Уæвгæ та йæ хъуыдыйы дæр нæ уыд аивады фæндагыл ацæуын. Кæддæр хъæууонхæдзарадон техникумы ахуырдзау йе мбæлттимæ ацыд театралон студимæ, сæ фарсхæцæгæй. Дагун Омаев сын æххуыс кодта уæлæдарæсæй, æмæ, сценæйы сæхи куыд дарой, уымæй дæр. Уым æм се ргом аздæхтой жюрийы уæнгтæ. Афтæ райдыдта артисты фæндаг аивады бæрзæндмæ. Комеди уа, æви трагеди, драма, æви лирикæ, алцы дæр ын иттæг хорз уади. Уарзта кино, фæлæ йæ цардæй фылдæр та - театр. 2017-æм азы Дагун Омаев хорзæхгонд æрцыд "Ирыстоны намысы майданæй". Уарзон артистыл 5-æм майы хъуамæ сæххст уыдаид 74 азы. ---------- Сайт ГТРК "Алания" - http://alaniatv.ru/ Facebook - https://www.facebook.com/alaniatvru/ Instagram - https://www.instagram.com/alaniatvru/ Telegram - http://t.me/alaniatvru ВКонтакте - https://vk.com/alaniatvru Twitter - https://twitter.com/alaniaTVru