Фæндаггон фыдбылызты нымæц Цæгат Ирыстоны фæкъаддæр

Фæндаггон фыдбылызты нымæц Цæгат Ирыстоны фæкъаддæр. Паддзахадон автоинспекцийы куыд фæнысан кодтой, афтæмæй хъуыддагыл хуыздæры `рдæм фæзынд видеоцæстдарды камерæтæ кæй сæвæрдтой, уый. Сæрмагонд программæ бæстонæй баххæст кодтой. Ныртæккæ фæндаггон фæткы домæнтæ чи нæ æххæст кæны, уыцы шофырты æнцондæр рабæрæг кæнæн у. Фæндаджы сæрты хизыныл сывæллæтты ахуыр кæнынц суанг скъолайы. Куыд æмæ кæм æмбæлы фæндаджы сæрты хизын? Сырх рухс куы судза, уæд æрлæуу, цъæх куы судза, уæд та - ацу. Сывæллæтты зондахасты фæндаггон цыд хъæлдзæг æмæ ирд вæййы, раст нывы хуызæн. Уыимæ дзы зынæй ницы ис. Фæлæ хистæртæ арæх фæндаггон цыды домæнтæ куыд æмбæлы, афтæ нæ феххæст кæнынц. Республикæйы, хæдтулгæтыл тагъд цæуын чи уарзы, ахæмтæ бирæ ис. Алы ран дæр сыл фембæлæн ис. Уыдоны аххосæй арæх æрцæуынц фæндаггон фыдбылызтæ. Фарон республикæйы рабæрæг кодтой 313 фæндаггон фыдбылызы зиан баййафджытимæ. Уыимæ фæндаггон фæтк хъахъхъæныц алы бон дæр патрулон службæтæ. Инспектортæн æххуыс кæнынц сæрмагонд видеокамерæтæ. Фаронимæ абаргæйæ, ацы аз уыдоны ифтонгад фæхуыздæр. Ныр æндæр бæстæты хæдтулгæты номыртæ дæр сæ бон уыдзæн раиртасын. Ахæм машинæтæ бонæй-бон фылдæр кæнынц. Темыраты Вадим, РЦИ-Аланийы паддзахадон автоинспекцийы видеоцæстдарды фæткхæлдтыты центры хицау: «Æппæт Уæрæсейы дæр бакуыстой программæйы ифтонгадыл. Уый фæрцы раиртасæн ис сæрмагонд æгъдаухæлдтытæ æмæ дарддæр машинæты хицæуттæн рахæссын уынаффæ. Ныр нæ бон у æндæр бæстæты машинæты хицæутты дæр иваргонд куы уой, æмæ рæстæгмæ куы нæ бафидой сæ ивар, уæдмæ сæ Уæрæсемæ ма руадзын». Камерæтæ ныртæккæ сты æнцонвадаты паддзахадон автоинспекцийы сайты. Ам нысангонд сты уыцы бынæттæ, кæцыты æвæрд ис сæрмагонд камерæтæ. Фенæн сæ ис алкæмæн дæр, æрмæст равзарын хъæуы хи регион. Темыраты Вадим, РЦИ-Аланийы паддзахадон автоинспекцийы видеоцæстдарды фæткхæлдтыты центры хицау: «Хицæнæй адæмæн сæ бон уыдзæн цавæрфæнды камерæйы бынат рабæрæг кæнын Уæрæсейы алы ран дæр: Ирыстон, Стъарапол, Мæскуы, Хъæрæсейы - уæлдай нæу. Уымæй уæлдай шофыртæ сæрмагонд сайты фендзысты сæ ивартæ æмæ сæ уыцы сайты дæр бафидын». Цæгат Иыстоны фæндаггон транспортон цауты нымæц фæкъаддæр 8,3 проценты бæрц. Фылдæр, паддзахадон автоинспекцийы кусджыты ныхæстæм гæсгæ, камерæты фæрцы. Республикæ бацахста 34 -æм бынат рейтингы къаддæр фыдбылызтимæ. Фæлæ уæддæр паддзахадон автоинспекцийы кусджыты курынц, цæмæй адæм къæрцхъусдæр уой фæндæгтыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv