Сывæллæтты фæлладуадзæн уавæрты тыххæй

Уæрæсейы Хицауады сæрдар Дмитрий Медведев бахæс кодта бæрнон кусджытæн, цæмæй рацаразой сывæллæтты фæлладуадзæн мадзæлттæ. Хъуамæ фæфылдæр уа сæ нымæц, стæй сын фæхуыздæр хъуамæ кæной сæ авналæнтæ. Премьер-министры уынаффæ мыхуыргонд æрцыд паддзахады официалон сайтыл. Куыд æххæстгонд цæуы, уымæн та дзуапп дæтдзысты ахуырады министр Ольга Васильева, стæй фæллойы министр Максим Топилин. Æмгъуыд сын радтой 30-æм мартъимæ. Амынд хæс царды рауадзыныл кусдзысты Хицауады экспертты Совет, хицаудзинады федералон оргæнтæ æмæ регионты разамынды минæвæрттæ. Уæ зæрдыл уын лæууын кæнæм, ивгъуыд азы сывæллæтты улæфты рæстæгыл Падзахадон Думæйы вице-спикер Ирина Яровая дæр кæй дзырдта. Йæ фæндонмæ гæсгæ, сывæллæтты фæлладуадзæн рæстæгимæ баст хъуыддæгтæ хъуамæ нысангонд уой регионты хицауадты сайттыл. Афтæмæй ныййарджытæн сæ бон уыдзæн сывæллæтты улæфтæн аккаг путевкæтæ агурын. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv