Республикæйы байгом кодтой цуан кæныны рæстæг

Цæгат Ирыстоны райдыдта цуан кæныны афон. Сæрмагонд фæтк фидаргонд æрцыд 16-æм ноябры 2010-æм азы Уæрæсейы æрдзон æвæрæнтæ æмæ экологийы министрады, стæй 9-æм июлы 2019-æм азы республикæйы æрдзон æвæрæнтæ æмæ экологийы министрады уынаффæтæм гæсгæ. Амынд дзы куыд ис, афтæмæй хъæддаг мæргътыл цуан кæныны сезон байгом уыдзæн 20-æм августы æмæ ахæсдзæн 2019-æм азы кæронмæ. Быдыры æмæ фæзты хъæддаг сырдтыл æнæ нæмыгæхсæг æмæ пневматикон хæцæнгарзæй, ома, зæгъæм, куыйтимæ, цуан кæныны бар ис ацы аз 10-æм июлæй 4-æм августмæ. Уыгæрдæнты æмæ цъымараты цæрæг ссырдтыл - 10-æм июлæй 24-æм июлмæ, доны цæрæг сырдтыл та - фыццæгæмæй 10-æм августмæ. Цуаны афон ма рувас, бирæгъ, хъæддаг куыдз, æхсæрсæттæг æмæ тæрхъустыл ацы аз уыдзæн 15-æм сентябрæй иннæ азы 28-æм февралмæ. Дзæбидыр, сычъи æмæ арсыл цуангæнæн ис 1-æм августæй 30-æм ноябрмæ. Цæгат Ирыстоны æрдзон æвæрæнтæ æмæ экологийы министрады кусджытæ сидынц республикæйы цуанонтæм, цæмæй амынд фæтк ма халой. Закъонхалджыты бафхæрæн ис суанг уголовон æгъдауæй дæр, æмæ уый хъуамæ алчи йæ зæрдыл дара. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv