Хъæугæ лæвæрттæ

Куысты рæстæг æвирхъау хабары йе `нæниздзинад хъыгдард кæмæн баййæфта, уыдонæн радон хатт балæвар кодтой ног хæдтулгæтæ. Æрвылаз пенсионерты æрхъуыды кæны Цæгат Ирыстоны социалон фæдзæхстады фонд. Ацы хатт кадджын уавæры хæдтулгæтæ балæвар кодтой 5 адæймагæн. Бæлвырддæр уæ хабæрттимæ базонгæ кæндзысты не сфæлдыстадон къорды уæнгтæ. Бурдзиуты Владимирæн фæзынд ног æххуысгæнæг. Балæвар ын кодтой ног хæдтулгæ. 40 азы бакуыста никелы куыстгæнæг комбинаты. Йе `нæниздзинад дæр уым фæцудыдта. Хъыгагæн, иу къах йедтæмæ йын нал ис. Ныртæккæ кусгæ нæ кæны. Йæ цард снывонд кодта йæ бинонтæн. Пенсиисæг Бурдзиуты Владимир: «Ацы хабар раджыйы цау у. Уралы мыл æрцыд æвирхъау хабар. Æрхаудта мыл бетон къæй, ласта 7 тоннæйы. Къраны шофыр æй æнæ барлæвæрдæй систа, æмæ афтæмæй уый æртыдта. Мæ къахыл æрхаудта æмæ мын æй алыг кодтой. Социалон фæдзæхстады фонды руаджы мын дзы дохтыртæ сæвæрдтой протез, æххуыс нын кæнынц. Ныр дæр та нын хæдтулгæтæ балæвар кодтой». Хæдтулгæты ног хицæуттæн æй равдыстой куыд кусынц, уый. Сæрмагондæй сæ ахæм адæмæн сарæзтой. Зæгъæм, Хъайырты Олегæн уыцы хорзæх паддзахад 3-аг хатт ракодта. Фыццаг дыууæ балæвар кодта йæ сывæллæттæн. Олегæн та йе `нæниздзинад Æрæфы районы колхозы кусгæйæ фæцудыдта. Мадзалмæ æрбацыд Цæгат Ирыстоны хицауады сæрдар Тускъаты Таймураз. Уый бузныджы ныхæстæ загъта пенсионертæн сæ бирæазыккон куысты тыххæй. Раарфæ сын кодта, цæмæй уой æнæниз æмæ рухс цæрæнбонæй æххæст. Республикæйы социалон фæдзæхстады фонд æрвылаз фæуары хæдтулгæтæ. 2001-æм азæй нырмæ дзы байуæрста 124. Ацы аз ног машинæтæ райстой 5 адæймаджы. Адæмæй куыстуæтты фæллой кæныны рæстæг кæмæн йæ астæуыхъæд баййæфта хъыгдард, чи та æндæр хуызы цæфтæ райста. Йе `нæниздзинад кæмæн фæкъахыр, уыдон æдæппæтæй сты 1334 адæймаджы. Алы мæй дæр райсынц æхцайы фæрæзтæ, социалон фæдзæхстады фондæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv